Հունաստանը և Կիպրոսը Եվրամիությանը տեղեկացրել են Սիրիայի հետ բացառիկ տնտեսական գոտի ստեղծելու Թուրքիայի գաղափարների մասին, որով անտեսվում է Կիպրոսի ինքնիշխան իրավունքները ծովի այս տարածքում։ Այս մասին Բրյուսելում ԵՄ գագաթնաժողովից հետո հայտարարել է Հունաստանի վարչապետ Կիրիակոս Միցոտակիսը։
«Նախ հիշեցնեմ, որ ոչ միայն Հունաստանի, այլև Եվրամիության տեսանկյունից թուրք-լիբիական հուշագիրը անօրինական է և անվավեր: Հասկանալի է, որ և՛ ես, և՛ Կիպրոսի նախագահ Նիկոս Խրիստոդուլիդեսը մեր գործընկերներին տեղեկացրել ենք այժմ հայտնի քննարկումների մասին, որ Թուրքիայի և Սիրիայի միջև կարող է ստեղծվել ինչ-որ բացառիկ տնտեսական գոտի՝ անտեսելով Կիպրոսի անվիճելի ինքնիշխան իրավունքները»,-ասել է Միցոտակիսը:
Նշենք, որ Հունաստանը չի ճանաչում Թուրքիայի և Լիբիայի միջև ծովային գոտիների սահմանազատման վերաբերյալ Անկարայի և Տրիպոլիի կառավարության միջև 2019 թվականի նոյեմբերին կնքված փոխըմբռնման հուշագիրը։ Այդ գոտիները տարածվում են, մասնավորապես, հունական Հռոդոս կղզու և Կրետե կղզու արևելյան հատվածի վրա՝ փաստացիորեն զրկելով նրանց սեփական մայրցամաքային շելֆի և բացառիկ տնտեսական գոտու իրավունքից։ Թուրքիան նաև բազմիցս հայտարարել է, որ «հունական կղզիները ոչ շելֆ ունեն, ոչ էլ բացառիկ տնտեսական գոտի»։
Հունաստանն իր հերթին Իտալիայի և Եգիպտոսի հետ 2020 թվականին համաձայնագրեր է կնքել ծովային գոտիների սահմանազատման վերաբերյալ։ Թուրք-լիբիական հուշագրում և հունաեգիպտական համաձայնագրում ուրվագծված գոտիները հատվում են հենց Հռոդոսի և Կրետեի մոտ:
Հետևեք մեզ տելեգրամում
