Քաղաքացիական նախաձեռնության կարգով Ազգային ժողովի քննարկման է ներկայացվել օրենքի նախագիծ ԵՄ-ին ՀՀ-ի անդամակցության գործընթացի մեկնարկի մասին, և այժմ Կառավարությունը պետք է սահմանված կարգով դիրքորոշում արտահայտի: Մենք առաջարկում ենք դրական դիրքորոշում արտահայտել: Այդ մասին Կառավարության՝ հունվարի 9-ի նիստին ասաց ԱԳ նախարար Արարատ Միրզոյանը՝ հիշեցնելով, որ վերջին տարիներին ՀՀ-ն և ԵՄ-ն բավականին ինտենսիվ և դինամիկ հարաբերություններ են ունեցել, այդ հարաբերություններն ունեցել են շատ հարուստ բովանդակություն, նաև ընդգրկել են տարբեր ոլորտներ:
«ԵՄ-ն տարբեր առիթներով ընդգծված քաղաքական աջակցություն է հայտնել Հայաստանի ժողովրդավարությանը: ԵՄ-ն պատրաստակամություն է հայտնել և, ըստ էության, ներգրավվել է ՀՀ-ի շուրջ անվտանգային միջավայրի ապահովմանը (նկատի ունեմ քաղաքացիական դիտորդական առաքելության տեղակայումը): ԵՄ-ն նաև պատրաստակամություն է հայտնել՝ աջակցելու Հայաստանի տնտեսական դիմակայունության ամրապնդմանը: Տեղյակ ենք, որ, ակնհայտորեն, ԵՄ-ն և անդամ երկրներն ունեն շատ հարուստ ժողովրդավարական ավանդույթներ, ուժեղ ժողովրդավարական ինստիտուտներ, ազատ մրցակցային միջավայր, արդիական տնտեսություն, առաջադեմ, զարգացած գիտություն… Նաև դուք՝ պարոն վարչապետ, եվրոպական խորհրդարանում ելույթ ունենալիս հայտարարել եք, որ ՀՀ-ն պատրաստ է մոտ լինել ԵՄ-ին այնքան, որքան ԵՄ-ն դա հնարավոր կհամարի: Մենք այդ հնարավոր համարելու նշաններն էլ ենք տեսել, նկատի ունեմ և՛ վիզաների ազատականացման մեկնարկը, և՛ մի շարք այլ գործիքներ, որոնք արդեն կիրառվել են կամ քննարկվում են մեր և ԵՄ-ի միջև: Օրինակ՝ գործընկերության նոր օրակարգը:
Եվ ահա, ելնելով այս հանգամանքներից, մենք առաջարկում ենք դրական դիրքորոշում արտահայտել, իհարկե, նաև որոշ առաջարկներ ունենք իրավական տեխնիկայի առումով. առաջարկում ենք համարակալել դրույթները, առաջարկում ենք ուժի մեջ մտնելու ժամկետ սահմանել և ըստ բովանդակության, որը բովանդակային կամ գուցե նաև ինչ-որ առումով խմբագրական կարելի է համարել, առաջարկում ենք «հռչակում է» բառերը փոխարինել «հայտարարում է» բառերով»,- ասաց նա:
Հետևեք մեզ տելեգրամում
