ԱՄՆ-ն փորձում է Թուրքիային համոզել չսկսել ռազմական գործողություն Սիրիայի քրդական ուժերի դեմ, որոնց Անկարան համարում է ահաբեկչական: Այդ մասին հայտնել է ԱՄՆ պետքարտուղար Էնթոնի Բլինքենը, փոխանցում է Ermenihaber.am-ը:
«Մենք բոլոր ջանքերը կգործադրենք, որպեսզի դա տեղի չունենա», – Փարիզում լրագրողներին ասել է Բլինքենը։
Ավելի վաղ Թուրքիայի արտաքին գործերի նախարար Հաքան Ֆիդանը Սիրիայի քրդական ուժերին սպառնացել էր ռազմական գործողությունով, եթե նրանք զենքը վայր չդնեն, հատկապես Սիրիայում տեղի ունեցած իշխանափոխությունից հետո:
Մամուլում նաև շրջանառվում էին լուրեր, թե Թուրքիայի զինված ուժերը Սիրիայի նոր իշխանության հետ համատեղ կարող են ռազմական գործողություն իրականացնել քուրդ զինյալների դեմ, որոնք դեռ իրենց վերահսկողության տակ են պահում Սիրիայի որոշ շրջաններ:
Հիշեցնենք, որ թուրք-ամերիկյան հարաբերություններում խնդրահարույց հարցերից մեկը Սիրիայի քրդական ուժերն են: ԱՄՆ-ն Սիրիայի քրդական ուժերին համարում է կարևոր գործոն տարածաշրջանի ահաբեկչական խմբավորումների դեմ պայքարում: Այդ ամենը դժգոհություն է առաջացնում Թուրքիայում: Վերջին տարիներին Թուրքիան մի շարք խոշոր ռազմական գործողություններ է իրականացրել Սիրիայի քրդական ուժերի դեմ, որի հետևանքով վերջիններս կրել են լուրջ կորուստներ, այդ թվում տարածքային:
Հետևեք մեզ տելեգրամում
