Հայաստանի և Ռուսաստանի հարաբերությունները հեշտ չեն, բայց երկխոսությունը շարունակվում է, և մոտ ապագայում նախատեսվում է Հայաստանի արտգործնախարար Արարատ Միրզոյանի այցը Մոսկվա։ Այս մասին 2024թ․ ամփոփիչ ասուլիսում հայտնել է ՌԴ նախարար Սերգեյ Լավրովը՝ նշելով, որ հայ գործընկերն ընդունել է հրավերը։
Միաժամանակ նախարարն անդրադարձել է ԵՄ-ին անդամակցելու գործընթաց սկսելու ՀՀ կառավարության վերջին որոշմանը, ինչպես նաև համաձայնվել է փոխվարչապետ Ալեքսեյ Օվերչուկի այն կարծիքին, որ ԵԱՏՄ-ին և ԵՄ-ին անդամակցության անհամատեղելի են։
«Անխոս, Հայաստանի օրինական ղեկավարության՝ ցանկացած միջազգային կառույցին, որտեղ իրեն սպասում են, միանալու գործընթաց սկսելու որոշումը իր սուվերեն որոշումն է։ Բայց բոլոր դրական և բացասական կողմերը կշռելը նաև Հայաստանի կառավարության պարտականությունն է»,- ասել է Լավրովը:
Խոսելով Երևանի և Վաշինգտոնի կողմից ռազմավարական գործընկերության համաձայնագրի ստորագրման մասին՝ ռուս նախարարը նշել է, որ նախ սա երկու պետությունների ինքնիշխան որոշումն է, և երկրորդ՝ գլխավորը ոչ թե փաստաթղթի վերնագիրն է, այլ այն, ինչ բխում է այդ փաստաթղթից։
Լավրովը նաև հիշեցրել է, որ Հայաստանը չի մասնակցում ՀԱՊԿ միջոցառումներին, սակայն արդարության համար ընդգծել է, որ Երևանը չի արգելափակում կազմակերպության կողմից որոշումների ընդունումը, այդ իսկ պատճառով կազմակերպությունն աշխատում և գործում է։
Հետևեք մեզ տելեգրամում
