Իրանցի միջազգայանգետ Էհսան Մովահեդիանն անդրադարձել է երեկ ԶԼՄ-ներում տարածված այն տեսանյութին, որում Իրանի մի քանի քաղաքացիներ ՀՀ հրապարակում կատարում են «Ղարաբաղ» երգը:
Մովահեդիանը թելեգրամյան իր ալիքում գրել է, որ հայ-իրանական հարաբերությունները գտնվում են զարգացման ամենաբարձր մակարդակում և նման տեսանյութերի տարածումը այդ հարաբերություններին վնաս հասցնելու նպատակ է հետապնդում:
«Ակնհայտ է, որ այդ տեսանյութը հին է, և նա, ով այս պայմաններում դա տարածել է, այլ նպատակ չի հետապնդում, քան Իրանի ու Հայաստանի հարաբերություններին վնաս հասցնելը»,- գրել է Մովահեդիանը՝ կոչ անելով «հայ ընկերների չտրվել այդ հերյուրանքների ազդեցությանը և լրջորեն վերաբերվել տեսանյութի կրկնօրինակման, կեղծ լինելու վարկածին»։
Իրանցի փորձագետը շեշտել է, որ Իրանի ազարիների ճնշող մեծամասնությունը, ինչպես մյուս իրանցիները, չունեն ռասիստական կամ խտրական մտածողություն և այն, որ Հայաստանը դարձել է Արևելյան Ատրպատական նահանգի արտահանման երկրորդ ուղղությունը, հստակ ցույց է տալիս դա:
«Իրանի և Հայաստանի դեմ Ալիևի երկու կոշտ և ագրեսիվ հարցազրույցներից և Հայաստանի տարածքով «Զանգեզուրի միջանցքի» ստեղծման մասին հայտարարություններից հետո սա վկայում է Բաքվի կառավարության՝ Հայաստանին Իրանից հեռացնելու ծրագրերի մասին: Բաքուն համարում է, որ միայնակ և առանց դաշնակից Հայաստանին ավելի հեշտ կպարտադրի իր պահանջները և օգտագործում է ամեն մեթոդ երկու երկրների հարաբերություններին վնաս հասցնելու համար»,-նշել է Մովահեդիանը։
Նշենք, որ վերոնշյալի վերաբերյալ հաղորդագրություն է տարածել ՀՀ ԱԱԾ-ը: Համաձայն հաղորդագրության՝ ս.թ. հունվարի 30-ի երեկոյան համացանցում տարածված և լայն արձագանք գտած տեսանյութի վերաբերյալ պարզաբանում ենք, որ տեսանյութում պատկերված անձինք իրականում հանդիսանում են Իրանի Իսլամական Հանրապետության քաղաքացիներ:
«Նշված անձինք Հայաստանի Հանրապետությունում են գտնվել 2024թ. դեկտեմբերի 30-ից մինչև ս.թ. հունվարի 3-ը:
Ազգային անվտանգության ծառայությունը կոչ է անում զերծ մնալ իրականությանը չհամապատասխանող և չճշտված տեղեկություններ հրապարակելուց և մեկնաբանություններից»,- ասված է հաղորդագրությունում:
Հետևեք մեզ տելեգրամում
