ԱՄՆ պետքարտուղար Մարկո Ռուբիոն և Եգիպտոսի արտգործնախարար Բադր Աբդելաթին երկուշաբթի օրը Վաշինգտոնում կայացած հանդիպման ժամանակ քննարկել են Գազայի հատվածի կառավարման և անվտանգության հարցերը: Այս մասին ասված է ԱՄՆ Պետքարտուղարության մամուլի ծառայության ղեկավար Թեմմի Բրյուսի գրավոր հայտարարության մեջ։
Ըստ այդ հայտարարության՝ Ռուբիոն «կրկնել է սերտ համագործակցության կարևորությունը՝ Գազայում հետկոնֆլիկտային կառավարման և անվտանգության ծրագրերի իրականացման համար»։ Պետքարտուղարը նաև ընդգծել է, որ պաղեստինյան «ՀԱՄԱՍ» շարժումը «այլևս երբեք չի կարողանա կառավարել Գազայի հատվածը կամ սպառնալ Իսրայելին»։
Երկու երկրների արտգործնախարարները խոսել են նաև «Սիրիայում տեղի ունեցող զարգացումների, ներառյալ ներառական կառավարում ունենալու անհրաժեշտության մասին և որ չպետք է թույլ տալ, որ երկիրը որպես ցատկահարթակ օգտագործվի ահաբեկիչների համար կամ սպառնա իր հարևաններին»: Ռուբիոն և Աբդելաթին նաև վերահաստատել են երկկողմ համագործակցության կարևորությունը խաղաղության և անվտանգության ամրապնդման համար։
Եգիպտոսի արտգործնախարարը Ռուբիոյի հետ հանդիպման սկզբում հայտարարել էր, որ Մերձավոր Արևելքում խաղաղություն կարող է ձեռք բերվել, բայց դա պետք է լինի այնպիսի պայմաններով, որոնք կապահովեն պաղեստինցիների օրինական իրավունքները, հատկապես՝ սեփական պետություն ստեղծելու նրանց իրավունքը:
Հետևեք մեզ տելեգրամում
