Վրաստանի արտգործնախարար Մակա Բոտչորիշվիլի պաշտոնական այց է կատարելու Անկարա։ Տեղեկությունը հայտնում են թուրքական ԶԼՄ-ները:
Հղում անելով ԱԳՆ բարձրաստիճան պաշտոնյայի՝ ԶԼՄ-ները գրում են, որ Թուրքիայի արտգործնախարար Հաքան Ֆիդանը Բոտչորիշվիլիի հետ հանդիպմանը նշելու է, որ Թուրքիայի հարաբերություններն իր հարևան և ռազմավարական գործընկեր Վրաստանի հետ հիմնված են փոխադարձ խորը ըմբռնման և հարգանքի ավանդույթի վրա։
Ֆիդանը արձանագրելու է, որ Թուրքիան կշարունակի ամուր աջակցություն ցուցաբերել Վրաստանի՝ եվրաատլանտյան կառույցների հետ ինտեգրման ջանքերին։
Ֆիդանը, ուշադրություն հրավիրելով այն փաստի վրա, որ Թուրքիան 16 տարի շարունակ Վրաստանի համար թիվ մեկ առևտրային գործընկերն է, կարևորելու է տնտեսական և առևտրային հարաբերությունների հետագա զարգացման հնարավորությունների քննարկումը։
Ֆիդանն ադնրադառնալու է նաև առաջիկա ամիսներին երկու երկրների միջև Համատեղ տնտեսական հանձնաժողովի հաջորդ նիստի պլանավորմանը, ընդգծելու է Միջին միջանցքի կարևորությունը տարածաշրջանի համար և դրանից դուրս, այս համատեքստում՝ Բաքու-Թբիլիսի-Կարս երկաթուղու լիարժեք հզորությամբ աշխատանքի սկսման համար համատեղ ջանքերի գործադրման անհրաժեշտությունը։
Ակնկալվում է, որ Ֆիդանը հայտարարելու է Թուրքիայի պատրաստակամության մասին՝ ամեն կերպ աջակցելու մեսխեթցի թուրքերի վերադարձին իրենց հայրենիք՝ Վրաստան։
Հետևեք մեզ տելեգրամում
