Թուրքական մամուլը վերջին մեկ շաբաթվա ընթացքում ողողված է հրապարակումներով, որոնք տեղեկացնում են, թե Թուրքիան օգնություն է տրամադրել Հայաստանին կորոնավիրուսի դեմ պայքարի համար։ Մասնավորապես պետական TRT-ի անգլալեզու ալիքը Թուրքիայի կողմից օգնություն ստացած երկրների ցանկում նշում է նաև Հայաստանը։ Այս ամենին նախորդել էր նախագահ Ռեջեփ Թայիփ Էրդողանի, նրա խոսնակ Իբրահիմ Քալընի հայտարարություններն առ այն, որ Հայաստանն օգնություն է խնդրել Թուրքիայից։Հայաստանի ԱԳՆ-ն պաշտոնական հայտարարությամբ պատասխանել է թուրքական պնդումներին՝ նշելով, որ Թուրքիայում գտնվող ՀՀ քաղաքացիների տարհանման հարցում օժանդակությունից բացի, որևէ այլ օգնության խնդրանքով չի դիմել այդ պետությանը։
Թեմայի վերաբերյալ «Region Monitor»-ը զրուցել է թուրքագետ Անահիտ Վեզիրյանի հետ, որը նշել է Թուրքիայի՝այս կեղծիքը քարոզչական նպատակներով օգտագործելու դրդապատճառները։
«Նախ առջևում Հայոց ցեղասպանության տարելիցն է՝ ապրիլի 24, որը ստվերելու համար Թուրքիայի համար հարմար առիթ է ստեղծվել։ Նման կեղծիքի տարածմամբ Թուրքիան փորձում է պատրանք ստեղծել, որ Անկարան հումանիզմից դրդված օգնության ձեռք է մեկնում անգամ իր նկատմամբ «թշնաբար» տրամադրված պետությանը։
Թուրքիան երկար տարիներ է, ինչ աշխատում է մարդասերի իմիջ ստեղծելու ուղղությամբ, և կորոնավիրուսի հետևանքով աշխարհում ստեղծված ծանր իրավիճակն օգտագործում է հենց այդ նպատակով։ Մյուս կողմից կա նաև ներքին լսարանի հարցը․ Թուրքիան նմանատիպ լուրերով սեփական հանրությանը փորձում է համոզել, որ Թուրքիան ոչ միայն հաջողությամբ պայքարում է կորոնավիրուսի դեմ, ապահովում ներքին կարիքները, այլ նաև կարողանում է օգնություն տրամադրել այլ երկրներին։
Սակայն որքան էլ Թուրքիան փորձում է հումանիստի դիմակ հագնել, միևնույն է նրա քայլերի տրամաբանությունը ցույց է տալիս, որ իր քաղաքականությունը հիմնված է այսրոպեական շահի վրա։ Հնարավոր չէ խոսել հումանիզմի փարոս լինելու մասին և, միևնույն ժամանակ անտեսելով միջազգային բոլոր նորմերը, շրջափակման մեջ պահել հարևան պետությանը։ Այս հայտարարությամբ մեր հարևանները մեկ անգամ ևս ցույց տվեցին, որ սուտը և կեղծ հումանիզմը իրենց հիմնական գործիքներից են։ Իսկ այն, որ Հայաստանին օգնություն տրամադրելու մասին նախագահ Էրդողանի, նրա խոսնակ Իբրահիմ Քալընի հայտարարութունները չեն համապատասխանում իրականությանը փաստում են հենց թուրք դիվանագետները, մասնավորապես խոսքը Ադրբեջանում Թուրքիայի դեսպանի մասին է։ Վերջինը ադրբեջանական լրատվամիջոցների հարցմանն ի պատասխան հերքել էր նախկինում հնչած հայտարարությունները»,- ընդգծել է թուրքագետը։
Հետևեք մեզ տելեգրամում
