Կալլաս. Չնայած արյունահեղությանը՝ ԵՄ-ն կշարունակի չեղարկել Սիրիայի նկատմամբ պատժամիջոցները

Եվրամիությունը մտադիր է շարունակել Սիրիայի դեմ պատժամիջոցների չեղարկումը՝ չնայած մարտի սկզբին Լաթակիա, Տարտուս, Համա և Հոմս նահանգներում խաղաղ բնակիչների սպանություններին: Այս մասին հայտարարել է Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը ԵՄ ԱԳ նախարարների հանդիպմանը ժամանելուն պես։

«ԵՄ-ն ցանկանում է, որ սիրիական իշխանությունները պատժեն արյունահեղության մեղավորներին: ԵՄ-ն նաև ցանկանում է շարունակել շարժվել պատժամիջոցները չեղարկելու ուղղությամբ, քանի որ, երբ մարդկանց համար հույս կա, երկրում ավելի քիչ քաոս է: Մարդիկ կարիք ունեն օգտվելու հիմնական ծառայություններից, մասնավորապես՝ բանկային ծառայություններից: Այսպիսով, մենք կքննարկենք դա, բայց առայժմ շարունակում ենք շարժվել պատժամիջոցները չեղարկելու ուղղությամբ»,-ասել է նա:

Մարտի 10-ին Արաբական Հանրապետության նոր իշխանությունները հայտարարեցին Լաթակիա, Տարտուս, Համա և Հոմս նահանգներում «նախկին նախագահ Բաշար ալ-Ասադի կողմնակիցների» դեմ գործողության ավարտի մասին։ Վերջին տվյալներով՝ բախումների հետևանքով խաղաղ բնակչության շրջանում զոհերի թիվը հասել է 973-ի։ Մահացածների մեծ մասը պատկանում է ալավիական համայնքին, որը կազմում է Արաբական Հանրապետության բնակչության 12%-ը։