Ազգային ժողովի եվրոպական ինտեգրման հարցերի մշտական հանձնաժողովը արտահերթ նիստում երկրորդ ընթերցմամբ քննարկեց և հաստատեց «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
Հանձնաժողովի նախագահ Արման Եղոյանը տեղեկացրել է, որ նախագիծը որոշ խմբագրական փոփոխությունների է ենթարկվել։ Մասնավորապես, նախաբանից հանվել է «Հայաստանի Հանրապետությունը՝ արտահայտելով Հայաստանի Հանրապետության ժողովրդի միասնական կամքը» հատվածը։
Փոփոխված ձևակերպման համաձայն՝ օրենքը շարադրվում է հետևյալ կերպ.
«Հայաստանի Հանրապետությունը, նպատակ ունենալով զարգացնել ժողովրդավարական ինստիտուտները, բարձրացնել հասարակության բարեկեցությունը, ամրապնդել երկրի անվտանգությունը, դիմակայունությունը և իրավունքի գերակայությունը, հայտարարում է Եվրոպական միությանը Հայաստանի Հանրապետության անդամակցելու գործընթացի մեկնարկը»։
Նախագիծն ընդունվեց հանձնաժողովի կողմից և կքննարկվի ԱԺ առաջիկա լիագումար նիստում։
Հիշեցնենք, որ ԱԺ-ը փետրվարի 11-ից սկսել էր Եվրամիությանը Հայաստանի անդամակցության գործընթաց սկսելու մասին օրենքի նախագծի քննարկումները։ Նախագիծը ներկայացրել է «Եվրաքվե» քաղաքացիական նախաձեռնությունը:
Հետևեք մեզ տելեգրամում
