Եգիպտոսի Ռազմական արտադրության պետնախարար Մոհամեդ Սալահ Էլ Դինն ընդունել է Կահիրեում ՀՀ դեսպան Արմեն Սարգսյանին: Այս մասին հայտնում է եգիպտական «Akhbar Elyoum» լրատվամիջոցը:
Եգիպտոսի պետնախարարը նախ ողջունել է Արմեն Սարգսյանին պաշտոնը ստանձնելու կապակցությամբ՝ առաքելությունում հաջողություն մաղթելով:
Նա նշել է, որ այս հանդիպման նպատակն է քննարկել համատեղ համագործակցության առաջարկվող ուղղությունները ռազմական և քաղաքացիական արտադրության ոլորտներում՝ ընդգծելով Եգիպտոսի և Հայաստանի միջև պատմականորեն ամուր և երկարատև համագործակցային հարաբերությունները, որոնք զգալի առաջընթաց են գրանցել վերջին շրջանում՝ երկու երկրների քաղաքական ղեկավարության աջակցությամբ:
Հանդիպման ընթացքում եգիպտացի պետնախարարը ներկայացրել է նախարարության կարողությունները ռազմական արտադրության ոլորտում՝ շեշտելով, որ նախարարության հիմնական դերը Եգիպտոսի զինված ուժերի և ոստիկանության համար զենքի, սարքավորումների և զինամթերքի պահանջարկի բավարարման մեջ է:
Իր հերթին դեսպան Արմեն Սարգսյանը նշել է, որ հայկական կողմը շահագրգռված է Եգիպտոսի, հատկապես ռազմական արդյունաբերության ոլորտի ընկերությունների հետ համագործակցությամբ՝ հաշվի առնելով դրանց արտադրական և տեխնիկական գերազանցությունը, ինչպես նաև նրանց դերը նորագույն տեխնոլոգիաների խորացման և տեղայնացման գործում: ՀՀ դեսպանը կարևորել է մասնագետների և տեխնիկական պատվիրակությունների փոխայցելությունները՝ երկու կողմերի տեխնոլոգիական և արտադրական հնարավորություններին ծանոթանալու և համագործակցության կոնկրետ ուղղությունները հստակեցնելու համար:
Դեսպան Սարգսյանի կարծիքով՝ նման այցերը կարևոր հարթակ են ռազմավարական համագործակցություն ստեղծելու համար:
Հետևեք մեզ տելեգրամում
