Ռուսաստանի Դաշնության նախագահ Վլադիմիր Պուտինն առաջարկել է ԱՄՆ-ի, եվրոպական երկրների և Ռուսաստանի «գործընկերների ու ընկերների» հետ քննարկել ՄԱԿ-ի հովանու ներքո Ուկրաինայում ժամանակավոր միջազգային վարչակազմի ներդրման հնարավորությունը։
Պուտինի կարծիքով, արտաքին վերահսկողությունը հնարավորություն կտա Ուկրաինայում ընտրություններ անցկացնել և «իշխանության բերել մի կառավարություն, որն ընդունակ է և վայելում է ժողովրդի վստահությունը»։
«Նրա հետ Ռուսաստանը կարող է բանակցություններ սկսել խաղաղության պայմանագրի շուրջ և ստորագրել փաստաթղթեր, որոնք «կճանաչվեն ամբողջ աշխարհում և կլինեն հուսալի և կայուն»: Հիմա Ռուսաստանի համար անհասկանալի է, թե ում հետ պետք է ինչ-որ բան ստորագրի, քանի որ «վաղը կգան այլ առաջնորդներ»,-ասել է նախագահը` դիմելով Արխանգելսկ ատոմային սուզանավի նավաստիներին:
«Բայց սա միայն մեկ տարբերակ է, ես չեմ ասում, որ ուրիշներ չկան․․․Բայց սա տարբերակներից մեկն է, և նման պրակտիկա գոյություն ունի ՄԱԿ-ի աշխատանքում»,- հավելել է Պուտինը:
Նրա խոսքով՝ քանի որ անցյալ տարի Ուկրաինայում նախագահական ընտրություններ չեն եղել, երկրում իշխանության քաղաքացիական մարմիններն այժմ անօրինական են, իսկ դա կարող է հանգեցնել նրան, որ «նեոնացիստական խմբավորումները» փաստացի կտիրեն երկիրը:
Հետևեք մեզ տելեգրամում
