ՀՀ-ում ԻԻՀ դեսպանատունը հայտարարություն է տարածել Հայաստանի Հանրապետության և Իրանի Իսլամական Հանրապետության համատեղ զորավարժության վերաբերյալ, որը տեղի է ունենալու երկու երկրների սահմանային գոտում:
«Հայաստանի Հանրապետության և Իրանի Իսլամական Հանրապետության զինված ուժերի հատուկ ստորաբաժանումները 2025թ. ապրիլի 10-ից 11-ը, «Խաղաղության զորավարժություն» անվանումով համատեղ զորավարժություն կանցկացնեն երկու երկրների սահմանային գոտում։
Այս զորավարժությունը նախատեսված է սահմանների անվտանգության ամրապնդման, երկու երկրների զինված ուժերի՝ հնարավոր սպառնալիքներին դիմակայելու պատրաստվածության, կայուն խաղաղության պահպանման և պաշտպանական ու ռազմական համագործակցության բարձրացման նպատակով: Այն կիրականացվի միաժամանակ սահմանի երկու կողմերում՝ միասնական հրամանատարության ներքո։
Երկօրյա այս համատեղ զորավարժությունը ցույց է տալիս Հայաստանի Հանրապետության և Իրանի Իսլամական Հանրապետության հանձնառությունը՝ երկու երկրների միջև ռազմավարական հարաբերությունների ամրապնդման, տարածաշրջանում խաղաղության ապահովման ու անվտանգության հաստատման նկատմամբ»։
Նշենք, որ ապրիլի 9-ին ՀՀ ՊՆ տարածած հաղորդագրության համաձայն՝ զորավարժությունը ենթադրում է Հայաստան-Իրան պետական սահմանին տեղակայված սահմանային անցակետերի վրա պայմանական ահաբեկչական խմբերի հարձակումը չեզոքացնելու գործողություններ:
Հետևեք մեզ տելեգրամում
