Վրաստանի արտգործնախարար Մակա Բոճորիշվիլին Դելֆոսի տնտեսական համաժողովի շրջանակներում անցկացված պանելային քննարկման ժամանակ խոսել է Հայաստանի և Ադրբեջանի հարաբերությունների կարգավորման մասին՝ շեշտելով, որ Վրաստանը պատրաստ է նպաստել հակամարտության վերջնական կարգավորմանը։
«Վրաստանը բազմիցս հայտարարել է, որ պատրաստ է նպաստել Ադրբեջանի և Հայաստանի միջև հակամարտության վերջնական կարգավորմանը, խաղաղության պայմանագրի ստորագրմանը, որպեսզի տարածաշրջանում լինի կայուն խաղաղություն»,-ասել է Բոճորիշվիլին։
Նա ևս մեկ անգամ շեշտել է, որ Վրաստանն ու Թբիլիսին միշտ լինելու են մի վայր, որտեղ Հայաստանն ու Ադրբեջանը կարող են գալ և օգտագործել երկխոսության համար։
«Մենք պատրաստ ենք նպաստել երկու գործընկերոջ, երկու հարևանի հետ հարաբերություններին։ Վրաստանը և Թբիլիսին միշտ էլ կլինեն այն վայրը, որտեղ երկու կողմն էլ՝ Հայաստանը և Ադրբեջանը, կարող են գալ և օգտագործել Վրաստանը որպես երկխոսության վայր, և վրացական կողմը միշտ կաջակցի այս գործընթացին՝ ի շահ տարածաշրջանում վերջնական կայուն խաղաղության հաստատման»,-հայտարարել է վրաց արտգործնախարարը։
Հետևեք մեզ տելեգրամում
