Թուրքական թվային հարթակներից GZT.com-ը ներկայացրել է հարցազրույց Ստամբուլի Մշակույթի Համալսարանի միջազգային հարաբերությունների ամբիոնի վարիչ, պրոֆեսոր, դոկտոր Չաղլա Գյուլ Յեսևիի հետ, որում վերջինս վերլուծել է հայ-թուրքական և հայ-ադրբեջանական կարգավորման գործընթացները։
Ըստ Յեսևիի, Հայաստանի քաղաքականությունում վերջին տարիներին նկատվում են թե՛ հռետորաբանության, թե՛ գաղփարախոսության փոփոխություններ։ Դրանց հիմնական շարժիչ ուժը եղել են 2020 թվականի 44-օրյա պատերազմից հետո ստեղծված իրողությունները, որոնցից հետո Հայաստանը ձեռնամուխ է եղել տարածաշրջանային կարգավորման նոր քաղաքականության ձևավորմանը։
«2021 թվականի հունիսից Հայաստանը պաշտոնապես սկսել է Թուրքիայի հետ երկխոսության գործընթաց՝ առանց նախապայմանների։ Ներկայումս երկկողմ բանակցություններն ընթանում են հատուկ ներկայացուցիչների մակարդակով՝ Ռուբեն Ռուբինյանի և Սերդար Քըլըչի միջև։ Ավիաչվերթները վերականգնվել են, երկաթուղային հաղորդակցությունը վերանորոգման փուլում է, միակ բացը ցամաքային սահմանների դեռևս փակ լինելն է»,-նշում է պրոֆեսորը։
Յեսևին ընդգծում է, որ մարտի 15-ին Փաշինյանը շատ կարևոր հանդիպում է ունեցել թուրք լրագրողների հետ։ Այդ հանդիպումն արժեքավոր էր, քանի որ դրա ընթացքում Հայաստանը ներկայացրել է իր դիրքորոշումները։ Ներկայացվել է «Խաղաղության խաչմերուկ»-ի նախաձեռնությունը, և Հայաստանը ևս մեկ անգամ շեշտել է իր տարածքային ամբողջականության և ինքնիշխանության հարգման կարևորությունը։
Պրոֆեսոր Յեսևին նշում է, որ Հայաստանը ներկայումս ձգտում է խորացնել հարաբերությունները Եվրոպական Միության հետ՝ միաժամանակ սառեցնելով իր ներգրավվածությունը ՀԱՊԿ-ում և ԵԱՏՄ-ում։ Նա չի բացառում, որ Ռուսաստանի արձագանքը կարող է լինել բացասական՝ հաշվի առնելով Ուկրաինայի և Վրաստանի նախադեպերը։
Ըստ բանախոսի Հայաստանը ցանկանում է բաց սահմաններ, տնտեսական ակտիվացում, կայունություն և անվտանգություն տարածաշրջանում։
Հետևեք մեզ տելեգրամում
