ԱՄՆ նախագահ Դոնալդ Թրամփը հայտարարել է, որ Իրանի նկատմամբ իր համբերությունը «շատ երկար չի շարունակվի» և Թեհրանին կոչ է արել համաձայնության հասնել Վաշինգտոնի հետ։ Այս մասին հայտնել է «Reuters»-ը։
Իրանի հարստացված ուրանի պաշարների վերադարձի անհրաժեշտության վերաբերյալ հարցին պատասխանելով՝ Թրամփը նշել է, որ դա ավելի շատ հանրային ընկալման, քան անվտանգության հարց է․ «Չեմ կարծում, թե դա անհրաժեշտ է, բացի հանրային հարաբերությունների տեսանկյունից։ Իհարկե, ես ինձ ավելի լավ կզգայի, եթե այն ստանայի, բայց կարծում եմ՝ դա ավելի շատ PR-ի հարց է, քան որևէ այլ բանի», – ասել է նա։
Նշենք, որ ԱՄՆ-ն, որը միջուկային զենք ունեցող ինը պետություններից մեկն է, պնդում է, որ Իրանը պետք է իր բարձր հարստացված ուրանի պաշարները դուրս բերի երկրից և հրաժարվի երկրի ներսում ուրանի հարստացումից։ Թեհրանը, որը հայտարարում է, որ միջուկային զենք չունի և չի ձգտում այն ստեղծել, ընդգծում է, որ ունի խաղաղ նպատակներով միջուկային տեխնոլոգիաներ զարգացնելու իրավունք, այդ թվում՝ ուրանի հարստացման, որպես Միջուկային զենքի չտարածման պայմանագրի մասնակից պետություն։
Հիշեցնենք, որ Իրանի խորհրդարանի խոսնակ Իբրահիմ Ռեզային երեքշաբթի հայտարարել էր, որ եթե Իրանը կրկին ենթարկվի հարձակման, երկիրը կարող է ուրանը հարստացնել մինչև 90 տոկոսի, ինչը համարվում է զենքի համար նախատեսված մակարդակ։
Հետևեք մեզ տելեգրամում
