Թուրքիայի Ազգային անվտանգության խորհուրդը (ԱԱԽ) կոչ է արել դադարեցնել ԱՄՆ-ի, Իսրայելի և Իրանի միջև պատերազմը և վերադառնալ բանակցությունների սեղանի շուրջ։ Այս մասին ասվում է Թուրքիայի նախագահ Ռեջեփ Թայիփ Էրդողանի նախագահությամբ սեպտեմբերի 30-ին կայացած ԱԱԽ նիստից հետո տարածված հաղորդագրությունում։
Խորհուրդը նախազգուշացրել է, որ ռազմական գործողությունների շարունակումը կարող է վերածվել հակամարտությունների նոր շրջափուլի՝ ավելի լուրջ հետևանքներ առաջացնելով ինչպես տարածաշրջանի, այնպես էլ ամբողջ աշխարհի համար։
ԱԱԽ-ն անդրադարձել է նաև Սիրիայում տեղի ունեցող զարգացումներին՝ ընդգծելով երկրի միասնության և տարածքային ամբողջականության ամրապնդման, պետական իշխանության տարածման և ինտեգրման գործընթացի կարևորությունը։ Նշվել է, որ Թուրքիան շարունակելու է աջակցել Սիրիային երկրի վերականգնման և միջազգային հանրության հետ հարաբերությունների զարգացման հարցում։
Գազայի և Լիբանանի վերաբերյալ խորհուրդը հայտարարել է, որ Իսրայելը շարունակում է հարձակումները՝ չկատարելով խաղաղության հաստատմանն ուղղված իր պարտավորությունները։ Անկարան միջազգային հանրությանը կոչ է արել կոնկրետ քայլեր ձեռնարկել Իսրայելի այն գործողությունների դեմ, որոնք, ըստ թուրքական կողմի, խոչընդոտում են տարածաշրջանային կայունությանը։
ԱԱԽ-ն քննարկել է նաև Ռուսաստան-Ուկրաինա պատերազմի վերջին զարգացումները՝ կողմերին կոչ անելով զսպվածություն ցուցաբերել և քայլեր ձեռնարկել հրադադարի հաստատման ուղղությամբ։
Հետևեք մեզ տելեգրամում
