ՀՀ պաշտպանության նախարար Սուրեն Պապիկյանի հրավերով մայիսի 20-ին պաշտոնական այցով Հայաստանում գտնվող Իրանի պաշտպանության նախարար Ամիր Ազիզ Նասիրզադեն Պապիկյանի հետ հանդիպման ժամանակ շեշտել Իրանի ու Հայաստանի հարաբերությունների ռազմավարական կարևորությունը։
Նասիրզադեն նշել է, որ Հայաստանը հատուկ տեղ ունի Իրանի հարևանային քաղաքականության մեջ։ Նրա խոսքով՝ Թեհրանի և Երևանի հարաբերությունները հիմնված են ամուր պատմական և մշակութային հիմքերի վրա, և Կովկասում կայուն խաղաղությունը կարող է լայն հնարավորություններ բացել տարածաշրջանի զարգացման համար։ Իրանցի նախարարն անդրադարձել է նաև Իրանում մուսուլմանների և հայերի խաղաղ համակեցությանը՝ դա համարելով տարբեր դավանանքների միջև հաջող համագործակցության օրինակ։ Նա հավելել է, որ Իրանի իսլամական հանրապետության հիմնարար քաղաքականությունը հարևան երկրների, հատկապես Հայաստանի հետ հարաբերությունների խորացումն է, և ոչ մի խոչընդոտ չի կարող խանգարել այդ ուղղությանը։
Նասիրզադեն իր աջակցությունն է հայտնել Հայաստանի և Ադրբեջանի միջև խաղաղության բանակցություններին՝ նշելով, որ Իրանը պատրաստ է աջակցել այդ գործընթացի արագացմանը։ Նա ընդգծել է, որ Կովկասում կայուն խաղաղությունը կբերի տարածաշրջանային զարգացման լայն հնարավորությունների։
Նասիրզադեն հիշեցրել է Իրանի հոգևոր առաջնորդի՝ ՀՀ վարչապետի հետ հանդիպման ժամանակ հնչեցրած դիրքորոշումը՝ նշելով, որ Իրանը կարևորում է Հայաստանի հետ հարաբերությունների զարգացումը և համագործակցության շարունակումը՝ հիմնված փոխադարձ շահերի վրա և անկախ արտաքին ուժերի ճնշումներից։
Իրանցի բարձրաստիճան պաշտոնյան ընդգծել է, որ Իրանի քաղաքականության անփոփոխ սկզբունքներից է տարածաշրջանի տարածքային ամբողջականության և սահմանների կայունության պահպանումը։ Նա շեշտել է, որ Իրանի և Հայաստանի միջև սահմանը երկու ժողովուրդների պատմական կապող ուղին է, և Թեհրանը երբեք չի ընդունի որևէ փորձ այն խաթարելու։ Իր խոսքի ավարտին նա զգուշացրել է Կովկասում արտատարածաշրջանային ուժերի միջամտության վտանգների մասին՝ նշելով, որ տարածաշրջանային անվտանգությունը պետք է ձևավորվի հենց տարածաշրջանի երկրների կողմից, քանի որ օտար միջամտությունը միայն ավելի շատ անկայունություն կառաջացնի։
Հանդիպման ավարտին Իրանի և Հայաստանի պաշտպանության նախարարությունների միջև ստորագրվել է համագործակցության հուշագիր։
Հետևեք մեզ տելեգրամում
