Վաշինգտոնը պատրաստ է Իրանի հետ քննարկել խաղաղ միջուկային ծրագիրը, սակայն կտրականապես դեմ է Իսլամական Հանրապետությունում ուրանի հարստացմանը։ Այս մասին հայտարարել է ԱՄՆ նախագահի հատուկ դեսպանորդ Սթիվեն Վիտկոֆը։
«Այժմ Իրանի հետ բանակցությունները կլինեն այն մասին, թե ինչպես ենք մենք վերաձևակերպելու Իրանի քաղաքացիական միջուկային ծրագիրը, որպեսզի այն ավելի լավը լինի և չներառի հարստացում»,-ասել է նա CNBC-ին տված հարցազրույցում: Վիտկոֆը հավելել է, որ «ԱՄԷ-ն և շատ այլ երկրներ ունեն ծրագրերի նմանատիպ մոդելներ»: ԱՄՆ առաջնորդի հատուկ ներկայացուցչի խոսքով՝ Թեհրանը «չպետք հարստացնի (ուրանը, խմբ.)՝ միջուկային էներգիայով զբաղվելու համար»:
Վիտկոֆի խոսքով, ԱՄՆ-ն նաև ակնկալում է, որ Իրանի հետ հնարավոր գործարքը կներառի նրա միջուկային ծրագրի նկատմամբ «խիստ վերահսկողություն»:
«Իրանը համաձայն է դրա հետ, մենք խոսել ենք դրա մասին: Եթե նրանք թաքցնելու ոչինչ չունեն, ապա նրանք խնդիր չեն ունենա ուժեղ վերահսկողության հետ: Ռաֆայել Գրոսիի գլխավորությամբ ԱԷՄԳ-ն այժմ աշխատում է այս ուղղությամբ: Մենք կարող ենք աջակցություն ցուցաբերել վերահսկողության իրականացման գործում»,-եզրափակել է նա։
Նշենք, որ ԱՄՆ նախագահ Դոնալդ Թրամփը հայտնել է, որ ԱՄՆ վարչակազմը հույս ունի հաջորդ շաբաթ Իրանի հետ նրա միջուկային ծրագրի վերաբերյալ բանակցություններ վարել և համաձայնության գալ:
Հետևեք մեզ տելեգրամում
