Թուրքիայի խորհրդարան է ներկայացվել ՀՀ հետ սահմանային անցակետը «Թալեաթ փաշա» անվանելու վերաբերյալ նախագիծ

Թուրքիայի ազգայնական «Լավ» կուսակցության նախագահ, պատգամավոր Մուսավաթ Դերվիշօղլուն խորհրդարան է ներկայացրել ՀՀ հետ սահմանային անցակետը «Թալեաթ փաշա» անվանելու վերաբերյալ օրենքի նախագիծ։ Նախագիծը ստորագրել է 28 պատգամավոր։

Նշվել է, որ ՀՀ հետ սահմանի Ալիջան անցակետն Թալեաթ փաշայի անունով կոչելը Թուրքիայի պատմությանը, անկախության պայքարին և ազգային հիշողությանը հավատարիմ մնալու դրսևորում կլինի։ Թալեաթ փաշան ներկայացվել է որպես «առաջատար քաղաքական գործիչ, որը թուրք ժողովրդի ճակատագրի ամենածանր շրջադարձային փուլում ստանձնել է պետական պատասխանատվությունը, կայսրության փլատակների տակից վեր է բարձրացրել ժողովրդի գոյության գիտակցությունը, եղել է գոյապայքարի ճարտարապետներից մեկը»։

Նշենք, որ Թալեաթ փաշան Հայոց ցեղասպանության գլխավոր կազմակերպիչն է։ Եղել է հայերի տեղահանումը և ցեղասպանությունը կազմակերպող «եռապետության» (Թալեաթ, Էնվեր, Ջեմալ) անդամ։ 1921 թվականի մարտի 15-ին՝ Բեռլինում, գնդակահարվել է Սողոմոն Թեհլիրյանի կողմից՝ Նեմեսիս գործողության շրջանակներում։