Իրանի ճանապարհների ու քաղաքաշինության նախարար Ֆարզանե Սադեղը, խոսելով Պարսից ծոցը Սև ծովին կապելու հարցի շուրջ, ընդգծել է, որ Ադրբեջանում և Հայաստանում տեղի ունեցած զարգացումների պայմաններում գլխավոր նպատակը Պարսից ծոցը և հարավի ազատ ջրերը Սև ծովին կապելն է։
«Անցկացված հանդիպումներում քննարկվել է Պարսից ծոցը երկաթուղային և ավտոմոբիլային ճանապարհներով Սև ծովի հետ կապելու հարցը։ Այս հարցը տրանսպորտային դիվանագիտության և տարանցման գլխավոր թեմաներից մեկն է եղել, և արդեն որոշ պայմանավորվածություններ են ձեռք բերվել»,- նշել է նա։
Նախարարը շեշտել է, որ քանի որ Հայաստանը ծովի ելք չունի, համաձայնություն է ձեռք բերվել, որ Իրանն իր հարավային լոգիստիկ հարթակների միջոցով համագործակցի Հայաստանի հետ։
Սադեղը հայտնել է, որ Նորդուզի սահմանում արդեն գոյություն ունեցող կամրջի կողքին անհրաժեշտ է կառուցել երկրորդ կամուրջ՝ հեշտացնելու բեռնափոխադրումը, ուղևորների տեղաշարժը և սարքավորումների տեղափոխումը։ Նախարարը անդրադարձել է նաև մաքսային գործընթացների հեշտացմանը՝ նշելով, որ երբեմն իրանցի վարորդները ավելի բարձր տուրքեր են վճարում, քան մյուս կողմի վարորդները։ Նա շեշտել է, որ այս խնդիրն արդարացի լուծելու և ընդհանուր փաթեթով կարգավորելու ուղղությամբ բանակցություններ են սկսվել։
«Մոտակա մեկ-երկու ամսում, երբ Հայաստանի ենթակառուցվածքների նախարարը կայցելի Իրան, նախատեսվում է ստորագրել նոր փաստաթղթեր»,- հավելել է նա։
Հետևեք մեզ տելեգրամում
