Իրանը և ԵՄ եռյակի երկրները՝ Մեծ Բրիտանիան, Գերմանիան և Ֆրանսիան, Ժնևում միջուկային դոսիեի շուրջ բանակցությունների հերթական փուլից հետո չեն կարողացել համաձայնության գալ Իսլամական Հանրապետության դեմ պատժամիջոցների վերսկսումը կանխելու վերաբերյալ։ Այս մասին հայտնել է Associated Press գործակալությունը՝ հղում անելով դիվանագիտական աղբյուրին։
Նրա խոսքով՝ Շվեյցարիայում բանակցությունները «ավարտվել են առանց վերջնական արդյունքի»։ Կողմերը չեն կարողացել համաձայնության գալ Իրանի դեմ 2015 թվականի համաձայնագրով չեղարկված պատժամիջոցների վերահաստատումը կանխելու վերաբերյալ։
Արտաքին գործերի փոխնախարարների մակարդակով հանդիպման ժամանակ քննարկվել է «եվրոպական եռյակի» պահանջը, որի համաձայն՝ Իրանը պետք է վերականգնի ԱԷՄԳ տեսուչների մուտքը իր միջուկային օբյեկտներ, ինչպես նաև վերսկսի դիվանագիտական բանակցությունները՝ իրանական միջուկային ծրագրի վերաբերյալ նոր համաձայնագրի հասնելու համար: Հակառակ դեպքում Թեհրանին սպառնում է պատժամիջոցների վերականգնում:
Խորհրդակցություններից հետո Իսլամական Հանրապետության փոխարտգործնախարար Քազեմ Ղարիբաբադին հայտարարել է, որ Իրանը շարունակում է մնալ դիվանագիտության և վիճելի հարցերի փոխշահավետ լուծման կողմնակից: Նա նշել է, որ ժամանակն է, որ «եվրոպական եռյակը» և ՄԱԿ-ի Անվտանգության խորհուրդը կատարեն ճիշտ ընտրություն՝ դիվանագիտությանը տալով ժամանակ և տարածք»:
Հետևեք մեզ տելեգրամում
