ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի հեռախոսազրույցից հետո մեկնաբանելով Ուկրաինային Tomahawk հեռահար հրթիռների մատակարարման հարցը՝ Թրամփը նշել է, որ Նահանգներն էլ դրանց կարիքն ունեն։
«ԱՄՆ-ում մեզ էլ են պետք Tomahawk հրթիռները։ Մենք շատ ունենք, բայց մեզ էլ են պետք։ Մենք չենք կարող սպառել մեր երկրի ռեսուրսները»,-նշել է նա Սպիտակ տանը լրագրողների հետ հանդիպմանը։
Հիշեցնենք, որ այսօր Սպիտակ տանը նախատեսված է Դ. Թրամփի ու Ուկրաինայի նախագահ Վլադիմիր Զելենսկու հանդիպումը։
CNN-ի փոխանցմամբ, նախատեսվում է, որ Զելենսկին Թրամփից կպահանջի լրացուցիչ հեռահարության զենքեր, որոնք կարող են հարվածել Ռուսաստանի տարածքում գտնվող թիրախներին։
Դոնալդ Թրամփը սոցիալական կայքի իր էջում հայտնել է, որ Վլադիմիր Պուտինի հետ երկարատև հեռախոսազրույցը շատ արդյունավետ էր։
«Հեռախոսազրույցի ավարտին մենք համաձայնեցինք, որ հաջորդ շաբաթ կայանա մեր բարձր մակարդակի խորհրդականների հանդիպումը։ Միացյալ Նահանգների նախնական հանդիպումները կվարի պետքարտուղար Մարկո Ռուբիոն՝ մի շարք այլ անձանց հետ միասին։ Հանդիպման վայրը դեռ պետք է որոշենք։ Այնուհետև նախագահ Պուտինի հետ կհանդիպենք համաձայնեցված վայրում՝ Բուդապեշտում, որպեսզի տեսնենք, արդյոք կարո՞ղ ենք վերջ դնելու Ռուսաստանի և Ուկրաինայի միջև այս «անփառունակ» պատերազմին։ Նախագահ Զելենսկիի հետ մենք վաղը կհանդիպենք Օվալաձև աշխատասենյակում, որտեղ կքննարկենք նախագահ Պուտինի հետ իմ զրույցը և շատ ավելին։ Կարծում եմ, որ այսօրվա հեռախոսազրույցի ընթացքում մեծ առաջընթաց է գրանցվել»,-նշել է Թրամփը։
Հետևեք մեզ տելեգրամում
