«Գալիք տարվա հունվարին կարող են նոր զարգացումներ տեղի ունենալ հայ-թուրքական կարգավորման գործընթացում»: Այդ մասին Regionmonitor-ի հետ զրույցում ասել է «Քարնեգի» հիմնադրամի ներկայացուցիչ, Թուրքիայի խորհրդարանի նախկին պատգամավոր Գարո Փայլանը, ով մասնակցել է Երևանում կայացած «Օրբելի ֆորում. Կառուցելով խաղաղություն և բազմակողմանի համագործակցություն» խորագրով քննարկմանը։
«Սկզբնական փուլում կլինի Հայաստան-Թուրքիա սահմանի բացումը երրորդ երկրների քաղաքացիների համար: Եթե ամեն ինչ լավ ընթանա, այս սահմանով կարող են անցնել նաև Հայաստանի ու Թուրքիայի քաղաքացիները»:
Անդրադառնալով այն հարցին, թե որքանով է Թուրքիայի հասարակությունը պատրաստ հայ-թուրքական սահմանի բացմանը, Փայլանը նշել է.
«Թուրքիայի հասարակությունն ամբողոջովին պատրաստ է սահմանի բացմանը: Այստեղ միակ խոչնդոտը Ադրբեջանն է: Գիտեք, որ Թուրքիան և Ադրբեջանը առաջնորդվում են «Մեկ ազգ, երկու պետություն սկզբունքով»: Ալիևը չի վստահում Հայաստանին, նա մտածում է, եթե Թուրքիան քայլ անի, ապա ինքը խաղաքարտ կկորցնի: Ըստ իս՝ Հայաստան-Թուրքիա, Հայաստան-Ադրբեջան գործընթացները կարող են միասին կարգավորվել, քանի որ կա Վաշինգտոնի առկայությունը, որի միջոցով պետք է իրագործվի TRIPP-ը: Եթե Իլհամ Ալիևն արգելքներ չստեղծի, ապա գալիք տարի մեծ զարգացումներ կլինեն»:
Փայլանը նաև անդրադարձել է այն հարցին, թե որքանով են պատրաստ հայ-թուրքական հարաբերությունների կարգավորմանը Թուրքիայի հասարակական և քաղաքական շերտի ազգայնական շրջանակները:
«Թուրքիայի ազգայնականները ամեն ինչին նայում են չափազանց պրագմատիկ: Որտեղ, որ Թուրքիայի շահը կա, նրանք այնտեղ են: 40 տարուց ավել նրանք դեմ էին քրդական հարցի կարգավորմանը: Այժմ անձամբ Թուրքիայի «Ազգայնական շարժում» կուսակցության նախագահ Դևլեթ Բահչելին, ով ամենաազգայնական մարդկանցից մեկն է Թուրքիայում, կողմ է քրդական հարցի կարգավորմանը: Սա ամենևին չի նշանակում, որ Բահչելին հանկարծ սկսեց դրական վերաբերմունք ցուցաբերել քրդերի, կամ Աբդուլլահ Օջալանի նկատմամբ: Ամենևին ոչ, պարզապես այս պահին դա բխում է Թուրքիայի շահերից»:
Հետևեք մեզ տելեգրամում
