Վրաստանի իշխանությունները դատական հայց կներկայացնեն BBC-ի դեմ ապատեղեկատվություն տարածելու համար

Վրաստանի իշխանությունները պատրաստվում են դիմել միջազգային դատարաններ՝ BBC լրատվական կորպորացիայի դեմ, մեղադրելով նրան կեղծ տեղեկություններ տարածելու մեջ։ Ինչպես հայտնել են իշխող «Վրացական երազանք» կուսակցությունից, BBC-ն իր հրապարակման մեջ պնդել է, թե վրացական ոստիկանությունը ցուցարարների դեմ կիրառել է քիմիական նյութեր։

BBC-ն նախօրեին հրապարակել էր հոդված, որտեղ ըստ ցույցերի մի շարք մասնակիցների՝ իշխանությունները 2024 թվականին Թբիլիսիում կիրառել էին Առաջին աշխարհամարտի ժամանակաշրջանի քիմիական նյութեր։

Վրացական կողմը հայտարարում է, որ վերոնշյալ հրապարակումը «կեղտոտ քարոզչություն» է, որի նպատակն է վարկաբեկել Վրաստանի կառավարությանը, ոստիկանությանը և պետությունը։

«Մենք որոշել ենք միջազգային դատարաններում սկսել իրավական գործընթաց այս սուտ տեղեկատվություն տարածող լրատվամիջոցի դեմ։ Կօգտագործենք բոլոր հնարավոր իրավական մեխանիզմները, որպեսզի BBC-ն պատասխան տա կեղծ մեղադրանքների համար»,-նշված է կուսակցության հայտարարությունում։