Ադրբեջանի նախկին առաջին փոխվարչապետի նկատմամբ հետախուզում է հայտարարվել

Ադրբեջանի Պետական ​​անվտանգության ծառայությունը (ՊԱԾ) պետական ​​իշխանությունը զավթելու հետ կապված քրեական գործի շրջանակներում հետախուզում է հայտարարել նախկին առաջին փոխվարչապետ Աբբաս Աբբասովի նկատմամբ։

Այս գործով գլխավոր մեղադրյալը Ռամիզ Մեհդիևն է՝ Ադրբեջանի նախագահի աշխատակազմի նախկին ղեկավարը (1995-2019): Հոկտեմբերին դատարանի որոշմամբ նա տնային կալանքի տակ էր՝ չորս ամիս ժամկետով: Նրա դեմ գործ է հարուցվել Ադրբեջանի քրեական օրենսգրքի 278.1 (պետական ​​իշխանությունը զավթելուն ուղղված գործողություններ), 274 (պետական ​​դավաճանություն) և 193-1.3.2 (հանցավոր ճանապարհով ձեռք բերված գույքի լվացում) հոդվածներով:

Քրեական գործի նյութերի հիման վրա որոշում է կայացվել մեղադրանք առաջադրել Աբբասովին, «ով երկար տարիներ Ռամիզ Մեհդիևի պաշտպանության ներքո խուսափել է պատասխանատվությունից, և հայտարարել հետախուզում, քանի որ գտնվում է Ադրբեջանի սահմաններից դուրս։

Աբբասովը Ադրբեջանի առաջին փոխվարչապետի պաշտոնը զբաղեցրել է 1992-2006 թվականներին։