Վրաստան մուտք գործելու համար 2026 թվականի հունվարի 1-ից սահմանվում է առողջության և դժբախտ պատահարի պարտադիր ապահովագրության պահանջ, սակայն մի խումբ անձինք այդ պարտավորությունից ազատված են։ Ըստ ՀՀ ՊԵԿ տեղեկատվության և հասարակայնության հետ կապերի բաժնի՝ պարտադիր ապահովագրության պահանջից ազատված են Վրաստան մուտքի դիվանագիտական կամ հատուկ արտոնագիր ունեցողները, դիվանագիտական, պաշտոնական, ծառայողական կամ հատուկ անձնագիր կրողները, Վրաստանում հավատարմագրված դիվանագիտական առաքելությունների, հյուպատոսական հիմնարկների, միջազգային կազմակերպությունների ներկայացուցչությունների աշխատակիցները, ինչպես նաև նրանց ընտանիքի անդամները, անձինք, որոնց մուտքը Վրաստան նախատեսված է Վրաստանի միջազգային համաձայնագրերով կամ պայմանագրերով, միջազգային ավտոմոբիլային բեռնափոխադրումներով և ուղևորափոխադրումներով զբաղվող վարորդները։
ՊԵԿ-ի փոխանցմամբ՝ մնացած զբոսաշրջիկների համար ապահովագրությունը պետք է ներկայացվի ֆիզիկական կամ էլեկտրոնային տարբերակով՝ վրացերեն կամ անգլերեն։ Այն կարող է տրամադրվել ինչպես վրացական, այնպես էլ արտասահմանյան ապահովագրական ընկերությունների կողմից և պետք է ունենա առնվազն 30 հազար լարիի (4200 դրամ) ապահովագրական սահմանաչափ։Ապահովագրությունը պետք է գործի Վրաստանում գտնվելու ողջ ժամանակահատվածում և պարունակի պայմանագրի կողմերի, ծածկույթի տարածքի, ապահովագրված ռիսկերի, ապահովագրության ժամկետների և ապահովագրական գումարի վերաբերյալ անհրաժեշտ տվյալներ։
Հետևեք մեզ տելեգրամում
