Փետրվարի 6-ին Բաքվի «İdrak» մասնավոր դպրոցում զինված միջադեպ է տեղի ունեցել․ 10-րդ դասարանի աշակերտը կրակել է ուսուցչուհու վրա նրան պատճառելով մարմնական վնասվածք։
Ադրբեջանի ՆԳ նախարարության փոխանցմամբ՝ միջադեպը տեղի է ունեցել դպրոցի շենքի դիմաց, ժամը 09։00-ին։ Աշակերտը ուսումնական հաստատություն է եկել որսորդական հրացանով, որը պատկանել է նրա հորը, և կրակոց արձակել մաթեմատիկայի ուսուցչուհու՝ Շ․Կ․-ի ուղղությամբ։
Ականատեսների վկայությամբ՝ կրակոցը հնչել է դասամիջոցի ընթացքում, իսկ փամփուշտը դիպել է ուսուցչուհու պարանոցի հատվածին։ Դեպքից հետո դպրոց են ժամանել իրավապահ մարմինների աշխատակիցները, ծնողները սկսել են իրենց երեխաներին դուրս բերել ուսումնական հաստատությունից։
Ադրբեջանի գլխավոր դատախազության հաղորդմամբ՝ դեպքի առթիվ հարուցվել է քրեական գործ՝ համապատասխան հոդվածով, իրականացվում է նախաքննություն։ Կրակոց արձակած աշակերտը ձերբակալվել է, իրավապահները զննում են դեպքի վայրը և իրականացնում անհրաժեշտ քննչական գործողություններ։
Նշվում է, որ տուժած ուսուցչուհուն ժամանակին ցուցաբերվել է առաջին բուժօգնություն, այնուհետև նա հոսպիտալացվել է։ Նրա վիճակը գնահատվում է միջին ծանրության։
Հետևեք մեզ տելեգրամում
