Թուրքիայի նախագահ Ռ.Թ. Էրդողանը, ելույթ ունենալով իր ղեկավարած «Արդարություն և զարգացում կուսակցության» խորհրդարանական խմբակցության նիստում, անդրադարձել է տարածաշրջանային և գլոբալ զարգացումներին՝ ընդգծելով Թուրքիայի դիվանագիտական ակտիվության նպատակները։
Նրա խոսքով՝ աշխարհում և տարածաշրջանում ընթացող գործընթացները խորհրդանշում են շրջադարձային փուլեր, որոնց իրենք հետևում են մեծ ուշադրությամբ։ «Մենք բոլորս ականատես ենք լինում մեր տարածաշրջանում և աշխարհում շրջադարձային պահեր խորհրդանշող զարգացումների։ Որպես իշխող կուսակցություն և դաշինք՝ մենք ուշադիր հետևում և վերլուծում ենք այդ զարգացումները և փորձում ենք դրանք ուղղորդել մեր երկրի օգտին՝ կատարելով անհրաժեշտ միջամտությունները», -հայտարարել է Էրդողանը։
Թուրքիայի նախագահը շեշտել է, որ Անկարան իր համար ցանկալի պայմանները ցանկանում է նաև «բարեկամ» և «եղբայրական» երկրների համար։ «Որպես Թուրքիա՝ ինչ ցանկանում ենք մեզ համար, նույնն ենք ցանկանում նաև մեր բարեկամների և եղբայրների համար։ Ինչպես մեզ համար ցանկանում ենք խաղաղություն, անվտանգություն, կայունություն, զարգացում և բարեկեցություն, այնպես էլ նույնն ենք ցանկանում մեր հարևաններին և բոլոր եղբայրական երկրներին», – նշել է նա։
Եզրափակելով՝ Թուրքիայի նախագահը հայտարարել է, որ իրենք նպատակ ունեն տարածաշրջանը դարձնել խաղաղության և բարօրության օրրան.
Հետևեք մեզ տելեգրամում
