Թեհրանն Անկարային հայտնել է իր պատրաստակամությունը՝ ստեղծելու փորձագիտական խումբ Իրանի կողմից Թուրքիայի դեմ ենթադրյալ հրթիռային արձակումները հետաքննելու համար։ «Արմենպրես»-ի փոխանցմամբ՝ այս մասին հաղորդում է «ՌԻԱ Նովոստի»-ն՝ վկայակոչելով Իրանի արտաքին գործերի նախարարության հայտարարությունը։
Գերատեսչությունը հայտնել է, որ Իրանի և Թուրքիայի արտաքին գործերի նախարարներ Աբբաս Արաղչին և Հաքան Ֆիդանը հեռախոսազրույց են ունեցել այս հարցի շուրջ։
Դրան նախորդել է երկու երկրների նախագահներ Մասուդ Փեզեշքիանի և Ռեջեփ Թայիփ Էրդողանի միջև հեռախոսազրույցը։
«Զրույցի ընթացքում կողմերը, հիմնվելով երկու նախագահների միջև պայմանավորվածության վրա, համաձայնել են հնարավորինս շուտ ստեղծել փորձագիտական խումբ՝ վերջին պնդումները մանրակրկիտ ուսումնասիրելու համար», – ասվում է Իրանի արտաքին գործերի նախարարության հայտարարության մեջ։
Ավելի վաղ Թուրքիայի նախագահի աշխատակազմը հայտնել էր, որ մարտի 9-ին Իրանից արձակված բալիստիկ հրթիռը Գազիանթեփ քաղաքի Շահինբեյ շրջանի երկնքում ՆԱՏՕ-ի օդային և հրթիռային պաշտպանության ուժերի կողմից վնասազերծվել է: Միջադեպի հետևանքով տուժածներ չկան։ Սա փետրվարի 28-ին Իրանի դեմ ԱՄՆ-ի և Իսրայելի ռազմական գործողությունների և Իրանի պատասխան հարվածների ընթացքում Թուրքիայի օդային տարածքում տեղի ունեցած երկրորդ նմանատիպ միջադեպն է։ Իրանը հերքել է առնչությունը նաև Թուրքիայի ուղղությամբ մարտի 4-ին հրթիռի արձակմանը։
Հետևեք մեզ տելեգրամում
