3 անձ կասկածվում է «Կանազի» շենքում գույք այրելու մեջ: Այս մասին հայտնել է ՆԳՆ խոսնակ Նարեկ Սարգսյանը։
ՆԳՆ Համայնքային ոստիկանության և ԱԱԾ ծառայողների համատեղ գործողությունների արդյունքում՝ մարտի 27-ին, երեք անձ հայտնաբերվել և ներկայացվել են նախաքննական մարմին, որոնք կասկածվում են մարտի 25-ին Ազատության պողոտայում գտնվող շինության ներսում գույք այրելու մեջ։
«Նախնական տվյալներով՝ 3 անչափահաս մտել են շենք, կիթառ նվագել, տաքանալու համար այրել են գույք, ինչի հետևանքով հրդեհ է բռնկվել։ Կատարվում է նախաքննություն»,-ասվում է Սարգսյանի գրառման մեջ:
Մարտի 25-ի երեկոյան՝ ժամը 19։12-ին, ՆԳՆ ՓԾ-ն ահազանգ է ստացել այն մասին, որ հրդեհ է բռնկվել Երևանի Ազատության պողոտայի 19 հասցեում գտնվող նախկին «Կանազ» մշակույթի տան չգործող չորսհարկանի շինությունում։ Հրդեհը հաջողվել է մարել ավելի քան չորսուկես ժամ անց՝ ժամը 23։44-ին։ Հրշեջ-փրկարարներին հաջողվել է նաև կանխել կրակի տարածումը դեպի շինության առաջին հարկ և հարակից բնակելի շենքեր։
Հետևեք մեզ տելեգրամում
