Գալիք տարվանից առողջապահության համընդհանուր ապահովագրության շահառու կդառնան նաև օնլայն տաքսիների վարորդները։
«Արմենպրես»-ի հաղորդմամբ՝ ՀՀ առողջապահության նախարար Անահիտ Ավանեսյանը կառավարության ապրիլի 2-ի նիստում, ներկայացնելով Առողջապահության համընդհանուր ապահովագրության փաթեթում փոփոխություններ կատարելու նախագիծը, մանրամասնեց, որ խոսքը վերաբերում է օնլայն տաքսու վարորդներին։Ավանեսյանը հստակեցրել է, որ օնլայն տաքսու վարորդները իրենք են նման առաջարկ ներկայացրել։
Ավանեսյանի խոսքով՝ առաջարկվող նախագծով արդեն իսկ ապահովագրված անձինք 2027 թվականի հունվարի 1-ից կկարողանան իրենց հետ փոխկապակցված անձանց ևս ներառել ապահովագրության համակարգում։
«Մեր քաղաքացիների կողմից նման առաջարկների ներկայացումը նաև ինչ-որ առումով ցուցիչ է, որ ընդհանուր առմամբ գոհունակություն կա համակարգի գործարկման մասով։ Մեր նպատակը սա էր, որ համակարգը, լինելով համընդհանուր, այնուամենայնիվ, առաջին հերթին լինի ցանկալի»,-ասաց նախարարը։
Փոփոխությունների համաձայն՝ անհատ ձեռնարկատերերի համար առողջության համընդհանուր ապահովագրավճարի ժամկետը ապրիլի 20-ից կտեղափոխվի հուլիսի 20-ը՝ լրացուցիչ ժամանակ ընձեռելով քաղաքացիներին իրականացնելու վճարումները։
Հետևեք մեզ տելեգրամում
