Միացյալ Նահանգների նախագահ Դոնալդ Թրամփը հայտարարել է Հորմուզի նեղուցով անցնող նավերի շրջափակման և Իրանին տուրք վճարած նավերի անցումը կասեցնելու գործընթաց սկսելու մասին։ Այս որոշումը կայացվել է Պակիստանի մայրաքաղաք Իսլամաբադում ԱՄՆ-ի և Իրանի միջև տեղի ունեցած բանակցությունների տապալումից հետո: Թրամփն իր Truth Social հարթակում շեշտել է, որ ԱՄՆ ռազմածովային ուժերը կանգնեցնելու են ցանկացած նավ, որը փորձում է մուտք գործել կամ լքել նեղուցը:
ԱՄՆ Կենտրոնական հրամանատարությունը (CENTCOM) հաստատել է, որ երկուշաբթի օրվանից իրանական բոլոր նավահանգիստների ուղղությամբ սկսում է ծովային շրջափակումը։ Ըստ հայտարարության՝ սահմանափակումները կտարածվեն բոլոր այն նավերի վրա, որոնք մուտք են գործում կամ հեռանում են իրանական նավահանգիստներից և ափամերձ տարածքներից: Նշվում է, որ այն նավերը, որոնք չեն ուղևորվում դեպի իրանական նավահանգիստներ կամ չեն գալիս այնտեղից, կկարողանան ազատորեն անցնել Հորմուզի նեղուցով։
Իրանական կողմն արդեն արձագանքել է սպառնալիքներին: Իսլամական հեղափոխության պահապանների կորպուսը զգուշացրել է, որ նեղուցին մոտեցող ցանկացած ռազմական նավի հետ կվարվեն «խստորեն և վճռականորեն»։ Իրանի խորհրդարանի խոսնակ Մոհամմադ Բաղեր Ղալիբաֆը սոցցանցերում հրապարակել է Սպիտակ տան մոտակայքում գտնվող լցակայանների գների լուսանկարը՝ ակնարկելով, որ շրջափակման հետևանքով ամերիկացիները շուտով կերազեն վառելիքի ներկայիս գների մասին։
Ապրիլի 12-ին Իսլամաբադում բանակցությունների ձախողումից և Թրամփի նոր սպառնալիքներից հետո համաշխարհային շուկայում նավթի գները կրկին հատել են 100 դոլարի սահմանագիծը։ Brent տեսակի նավթի գինն աճել է 8%-ով՝ հասնելով 102 դոլարի, իսկ ամերիկյան հում նավթի գինը բարձրացել է մինչև 104 դոլար։ Թրամփը հայտարարել է, որ թույլ չի տա Իրանին եկամուտ ստանալ նավթի վաճառքից, սակայն փորձագետները նախազգուշացնում են, որ այս դիմակայությունը կարող է հանգեցնել ԱՄՆ-ում բենզինի գների հետագա կտրուկ աճի, որոնք պատերազմի սկզբից ի վեր արդեն իսկ բարձրացել են 38%-ով։
Հետևեք մեզ տելեգրամում
