Թբիլիսիի քաղաքային դատարանը կոռուպցիայի մեղադրանքով ձերբակալված Վրաստանի պաշտպանության նախկին նախարար Ջուանշեր Բուրճուլաձեին դատապարտել է 10 տարվա ազատազրկման։ Այս մասին հայտնել են վրացական ԶԼՄ-ները։
Բուրճուլաձեն մեղավոր է ճանաչվել պաշտոնեական լիազորությունները չարաշահելու և առանձնապես խոշոր չափերով ապօրինի եկամուտների օրինականացման (փողերի լվացման) մեջ։ Գործը վերաբերում է ռազմական հոսպիտալի համար ՄՌՏ սարքի գնմանը։ Նույն դրվագով բյուջետային միջոցների վատնման համար մեղադրվում են նաև պաշտպանության նախկին փոխնախարար Գեորգի Խաինդրավան, գնումների դեպարտամենտի նախկին ղեկավար Վլադիմիր Գուդուշաուրին, ինչպես նաև նախկին նախարարի ազգական Վասիլ Մխեիձեն։ Քննության համաձայն՝ խումբը միտումնավոր ստեղծել է ոչ մրցակցային միջավայր և պայմանագրի արժեքը բարձրացրել է 1.3 միլիոն լարիով՝ յուրացնելով տարբերությունը։
Ազատազրկումից բացի, դատարանը որոշել է բռնագրավել Բուրճուլաձեի ընտանեկան գույքը՝ Իսպանիայում գտնվող վիլլան և Թբիլիսիի մերձակա Ծկնեթի էլիտար ավանում գտնվող տունը։ Այս ակտիվները պետք է փոխհատուցեն վնասը, որը դատախազությունը գնահատել է մոտ 8 միլիոն լարի։ Խաինդրավան և Մխեիձեն դատապարտվել են յուրաքանչյուրը 8 տարվա ազատազրկման։ Մխեիձեի գույքի մի մասը բռնագրավվելու է որպես գործով իրեղեն ապացույց։
Գուդուշաուրին միակն է, ով խուսափել է իրական ազատազրկումից։ Նա կնքել է դատավարական համաձայնություն դատախազության հետ, ընդունել մեղքը և, ըստ ԶԼՄ-ների, ցուցմունքներ է տվել նախկին ղեկավարների դեմ։ Դատարանը նրան նշանակել է 4 տարվա պայմանական պատիժ, 10 հազար լարի տուգանք և մեկ տարվա արգելք պաշտոններ զբաղեցնելու համար։
Նախկին նախարար Բուրճուլաձեն մեղքը ընդունել է մասնակիորեն՝ հիմնական պատասխանատվությունը դնելով ենթակաների վրա։ Միևնույն ժամանակ նա կտրականապես հերքել է փողերի լվացման վերաբերյալ մեղադրանքները։
Դատավճռի հրապարակմանը նախկին նախարարը չի ներկայացել։ Պաշտպանությունն արդեն հայտարարել է, որ պատրաստվում է բողոքարկել որոշումը։
Հիշեցնենք, որ Բուրճուլաձեն պաշտպանության նախարարի պաշտոնը զբաղեցրել է 2021 թվականի փետրվարից մինչև 2024 թվականի փետրվար՝ Իրակլի Ղարիբաշվիլիի կառավարությունում։ Ղարիբաշվիլին հունվարին դատապարտվել է 5 տարվա ազատազրկման՝ ապօրինի ձեռնարկատիրության և փողերի լվացման մեղադրանքը ընդունելուց հետո։
Հետևեք մեզ տելեգրամում
