«Ձեռնարկում ենք անհրաժեշտ քայլերը կարգավորման գործընթացում»․ ԱԶԿ-ի փոխնախագահը՝ հայ-թուրքական հարաբերությունների մասին

Թուրքիայի իշխող «Արդարություն և զարգացում» կուսակցության փոխնախագահ Քուրջադ Զորլուն, ելույթ ունենալով «Թուրքիա-Ադրբեջան բարեկամության, համագործակցության և համերաշխության» հիմնադրամի կողմից կազմակերպված քննարկմանը, նշել է, որ Թուրքիայի, Ադրբեջանի և Հայաստանի միջև հարաբերությունները 44-օրյա պատերազմից հետո հասել են որոշակի մակարդակի և ընդգծել է․

«Այս հարցում Ադրբեջանի դիրքորոշումը, նրա մոտեցումը և Հայաստանի հետ ընթացող հարաբերությունները մեր առաջնային օրակարգն են։ Մենք համատեղ աշխատում ենք այս ուղղությամբ և ձեռնարկում ենք անհրաժեշտ քայլերը մեր հարաբերությունների կարգավորման գործընթացում»։

Նա նաև հիշեցրել է, որ ապրիլի 27-ին Կարսում տեղի է ունեցել Կարս-Գյումրի երկաթուղու վերագործարկմանը նվիրված աշխատանքային խմբի նիստ՝ հավելելով. «Հավատում եմ, որ այս բոլոր նախապատրաստական աշխատանքները քայլ առ քայլ կրկին կյանքի կկոչվեն Հայաստանի և Ադրբեջանի միջև շարունակվող խաղաղության բանակցություններին զուգահեռ, երբ դրանք ընթանան մեր ուզած և մեզ արժանի հունով»։