Արաբական Միացյալ Էմիրությունները Իրանին մեղադրել է իր երկրի դեմ հրթիռներով և անօդաչու թռչող սարքերով զանգվածային հարձակում իրականացնելու մեջ, ինչի հետևանքով Ֆուջեյրայի նավթավերամշակման գործարանում հրդեհ է բռնկվել, իսկ Հնդկաստանի երեք քաղաքացի ստացել են վնասվածքներ։ Փոխանցում է «Ալ-Ջազիրան»:
ԱՄԷ պաշտպանության նախարարության տվյալներով՝ օրվա ընթացքում երկրի հակաօդային պաշտպանությունը խոցել է Իրանից արձակված 12 բալիստիկ հրթիռ, երեք թևավոր հրթիռ և չորս անօդաչու սարք։ Թեև պաշտոնական Թեհրանը դեռևս չի մեկնաբանել միջադեպը, իրանական պետական հեռուստատեսությունը, հղում անելով իրազեկ ռազմական աղբյուրին, կատարվածը վերագրել է «ամերիկյան ռազմական արկածախնդրությանը, որի նպատակը նեղուցով նավերի անօրինական տարանցումն է»։
Ավելի վաղ ԱՄՆ նախագահ Դոնալդ Թրամփը հայտնել էր «Ազատություն» նախագծի մեկնարկի մասին, որի հայտարարված նպատակը Հորմուզի նեղուցով նավերի անցումն ապահովելն է: Այն ենթադրում է, որ ամերիկյան ռազմական ուժերը (կործանիչներ, ուղղաթիռներ և ռազմանավեր) անմիջականորեն պաշտպանում և ուղեկցում են այն նավերին, որոնք ցանկանում են անցնել արգելափակված ջրային ուղով: Իրանի ԶՈւ-ն առևտրային նավերին չգուշացրել է չօգտվել ամերիկյան առաջարկից՝ շեշտելով, որ ամերիկյան ուժերը հարձակման կենթարկվեն նեղուց մուտք գործելու փորձի դեպքում։
Հետևեք մեզ տելեգրամում
