Ռուսաստանի գիտությունների ակադեմիայի Տիեզերական հետազոտությունների ինստիտուտի Արեգակնային աստղագիտության լաբորատորիան հայտնում է, որ Արեգակի հակառակ կողմում ձևավորվել է արևային բծերի հսկայական խումբ, որն իր չափերով վերջին տարիների ամենավտանգավորներից մեկն է։
Այս ակտիվ գոտին ներկայումս ֆիքսվում է Solar Orbiter տիեզերական ապարատի միջոցով, իսկ Երկրից այն տեսանելի կդառնա մոտ մեկ շաբաթից։ Գիտնականների պարզաբանմամբ՝ ակտիվ գոտու չափսն ուղիղ համեմատական է սպասվող բռնկումների հզորությանը, քանի որ պայթյուններն իրենց էներգիան ստանում են Արեգակի մագնիսական դաշտից, որի լարվածությունը կապված է հենց բծերի մեծության հետ։ Նմանատիպ երևույթ Արեգակի վրա վերջին անգամ դիտվել էր երկու տարի առաջ, ինչից հետո տեղի ունեցած պայթյունների շարքն առաջացրել էր վերջին 20 տարվա ամենաուժեղ մագնիսական փոթորիկը։
Մասնագետները նշում են, որ ևս երկու շաբաթից այս կենտրոնը կհայտնվի Երկրի նկատմամբ ամենավտանգավոր դիրքում՝ ուղիղ դիմաց, սակայն այդ ընթացքում այն կարող է ինչպես ամբողջությամբ անհետանալ, այնպես էլ նոր էներգիա կուտակել։
Արևային բծերը Արեգակի մակերեսի այն հատվածներն են, որտեղ մագնիսական դաշտը խիստ ակտիվ է։ Երբ այդ էներգիան կուտակվում է և հանկարծակի ազատվում, առաջանում են արևային բռնկումներ։Պարզ ասած՝ սա Արեգակի վրա տեղի ունեցող «էներգիայի պայթյունների» գործընթաց է, որը երբեմն կարող է ազդել նաև Երկրի վրա տեխնիկական համակարգերի աշխատանքի վրա։
Մասնավորապես, ուժեղ արևային բռնկումները կարող են առաջացնել մագնիսական բուքեր, որոնք ժամանակավորապես խանգարում են կապի, GPS նավիգացիայի, արբանյակների և որոշ էլեկտրական համակարգերի աշխատանքը։Մարդկանց առողջության համար այս երևույթը սովորաբար վտանգավոր չի համարվում, սակայն գիտնականները շարունակում են հետևել իրավիճակին, քանի որ ակտիվության մակարդակը կարող է փոխվել կարճ ժամանակում։
Հետևեք մեզ տելեգրամում
