Թուրքիայի գլխավոր ընդդիմադիր լրատվամիջոցներից T24-ի կայքն ու սոցիալական ցանցերի էջերը դատարանի որոշմամբ արգելափակվել են։ Որոշումը կայացվել է Ստամբուլի գլխավոր դատախազության «Իմ ընտանիքն ապահով է» հետաքննության շրջանակում։ Region Monitor-ի հաղորդմամբ՝ այս մասին հայտնում են թուրքական ԶԼՄ-ները։
Թուրքիայի արդարադատության նախարարության կողմից տարածված տեղեկության համաձայն՝ T24-ը վերջին մեկ տարվա ընթացքում հրապարակել է 118 նյութ, որոնք որակվել են որպես «ԼԳԲՏԻ քարոզչության» բնույթ ունեցող։ Այդ հիմքով Ստամբուլի գլխավոր դատախազությունը դիմել է դատարան՝ T24-ի կայքի և սոցիալական ցանցերի էջերի հասանելիությունն արգելափակելու համար։
Ստամբուլի առաջին քրեական դատարանը նախ մերժել էր հասանելիության արգելափակման պահանջը, սակայն դատախազության բողոքից հետո որոշում է կայացրել արգելափակել T24-ի կայքն ու սոցիալական ցանցերի էջերը։ Որոշումն ընդունվել է սեպտեմբերի 29-ին և կատարման համար ուղարկվել կիբերանվտանգության վարչություն։
T24-ը հայտարարել է, որ դատարանի որոշմամբ արգելափակվել է ոչ միայն նշված 118 նյութերի, այլև T24-ի ամբողջ բովանդակության հասանելիությունը։ Լրատվամիջոցը հայտարարել է, որ որոշման դեմ սկսել է իրավական գործընթաց՝ նշելով, որ որոշման հիմքում դրված 118 նյութերից 57-ի հեղինակներից 22-ը տարիներ առաջ են գրել T24-ում և այլևս չեն համագործակցում լրատվամիջոցի հետ։ Վերջինս նաև պնդել է, որ նշված նյութերից մի քանիսը, որոնք իսկապես հրապարակվել են վերջին մեկ տարվա ընթացքում, չեն պարունակում «ԼԳԲՏԻ քարոզչություն»։
Ավելի ուշ 13 լրագրողական և մամուլի մասնագիտական կազմակերպություններ համատեղ հայտարարությամբ քննադատել են T24-ի նկատմամբ կիրառված արգելափակումը՝ պահանջելով չեղարկել որոշումը։
T24-ը գործում է 2009 թվականից և Թուրքիայի անկախ առցանց ընդդիմադիր լրատվամիջոցներից է։
Տեղեկացնենք, որ «Իմ ընտանիքն ապահով է» հետաքննության շրջանակում Թուրքիայում վերջին շաբաթներին մի շարք կայքերի և սոցիալական ցանցերի էջերի նկատմամբ ևս հասանելիության սահմանափակումներ են կիրառվել։
Հետևեք մեզ տելեգրամում
