Ռուսաստանի Պետդումայի իններորդ գումարման առաջին նիստում Վյաչեսլավ Վոլոդինը կրկին ընտրվել է խորհրդարանի ստորին պալատի նախագահ։ Նա դարձել է Պետդումայի առաջին խոսնակը, որը պաշտոնը զբաղեցնում է ավելի քան երկու ժամկետ անընդմեջ։ Այս մասին հայտնում է «ՏԱՍՍ» լրատվական գործակալությունը։
Վոլոդինի թեկնածությանը կողմ է քվեարկել պատգամավորների 90,2%-ը, իսկ նրա մրցակից, Ռուսաստանի Դաշնության Կոմունիստական կուսակցության կողմից առաջադրված Դմիտրի Նովիկովը ստացել է ձայների 8%-ը։
Պետդումայի նախագահի առաջին տեղակալներ են նշանակվել «Միասնական Ռուսաստան» կուսակցությունը ներկայացնող Իրինա Յարովայան և Ռուսաստանի Դաշնության Կոմունիստական կուսակցության ներկայացուցիչ Իվան Մելնիկովը։ Նախագահի տեղակալների պաշտոնները ստացել են նաև «Միասնական Ռուսաստան»-ի ներկայացուցիչներ Վլադիմիր Վասիլևը, Ալեքսանդր Ժուկովը, Վիտալի Սավելիևը, Աննա Կուզնեցովան, Ալեքսեյ Գորդեևը և Վիկտորյա Աբրամչենկոն, Լիբերալ-դեմոկրատական կուսակցության ներկայացուցիչ Մարիա Վորոպաևան, «Նոր մարդիկ» կուսակցությունից Վլադիսլավ Դավանկովը և «Արդար Ռուսաստան» կուսակցությունից Ալեքսանդր Բաբակովը։
Վոլոդինը Պետդուման ղեկավարում է 2016 թվականից։ Մինչ այդ՝ 2011-2016 թվականներին, նա զբաղեցրել է Ռուսաստանի նախագահի աշխատակազմի ղեկավարի առաջին տեղակալի պաշտոնը, իսկ 2010-2011 թվականներին եղել է Ռուսաստանի կառավարության փոխվարչապետ և կառավարության աշխատակազմի ղեկավար։
Հիշեցնենք, որ սեպտեմբերի 18-20-ը Ռուսաստանում անցկացված Պետդումայի իններորդ գումարման ընտրությունների արդյունքում «Միասնական Ռուսաստան»-ը ստացել է 349 մանդատ, Ռուսաստանի Դաշնության Կոմունիստական կուսակցությունը՝ 37, Լիբերալ-դեմոկրատական կուսակցությունը՝ 23, «Նոր մարդիկ»-ը՝ 19, «Արդար Ռուսաստան»-ը՝ 17, «Հայրենիք»-ը՝ մեկ, իսկ չորս մանդատ ստացել են ինքնաառաջադրված թեկնածուները։
Հետևեք մեզ տելեգրամում
