Իսրայելի վարչապետ Բենիամին Նեթանյահուն հայտարարել է, որ Դուբայից Թել Ավիվ թռչող Flydubai-ի ինքնաթիռում երկրորդ օդաչուին վնասազերծած ուղևորներն ու անձնակազմի անդամները կանխել են «սեպտեմբերի 11-ի աղետը»։
CNN-ին տված հարցազրույցում Նեթանյահուն հայտարարել է, որ երկրորդ օդաչուն դանակահարել է ինքնաթիռի հրամանատարին և, ըստ նախնական վարկածի, փորձել կործանել օդանավը։ Վարչապետը, սակայն, չի հստակեցրել՝ արդյոք կասկածյալը մտադիր էր ինքնաթիռն ուղղել որևէ շինության։ Նա նաև նշել է, որ հնարավոր հարձակման մասին նախնական հետախուզական տեղեկություններ չեն եղել։
Ըստ Նեթանյահուի՝ վիրավոր հրամանատարը՝ Հնդկաստանի քաղաքացի Սմիթ Մաչչհարը, կարողացել է բացել օդաչուների խցիկի դուռը, ինչից հետո ուղևորներն ու անձնակազմի անդամները վնասազերծել են երկրորդ օդաչուին։ Սաուդյան Արաբիայի իշխանությունները ձերբակալել և հարցաքննել են նրան։ Միջադեպի շարժառիթը դեռ հայտնի չէ։
Միջադեպից հետո Իսրայելը մտադիր է խստացնել դեպի երկիր չվերթներ իրականացնող բոլոր ավիաընկերությունների օդաչուների ստուգումները։ Իսրայելի վարչապետի գրասենյակի ներկայացուցիչ Դորոն Շպիլմանը Reuters-ին հայտնել է, որ Նեթանյահուն հանձնարարել է ստուգել դեպի Իսրայել թռչող բոլոր օդաչուների ինքնությունը և ուսումնասիրել նրանց տվյալները։ Միջոցառումները կվերաբերեն ինչպես իսրայելական, այնպես էլ օտարերկրյա ավիաընկերություններին։
Հիշեցնենք, որ Flydubai-ի ինքնաթիռում միջադեպը տեղի է ունեցել սեպտեմբերի 30-ին՝ Դուբայից Թել Ավիվ ուղևորվող FZ1073 չվերթի ընթացքում։ Ինքնաթիռում եղել է 174 մարդ, որոնց մեծ մասը Իսրայելի քաղաքացիներ են եղել։ Օդանավը արտակարգ վայրէջք է կատարել Սաուդյան Արաբիայի Թաբուք քաղաքում։
Flydubai-ը ժամանակավորապես դադարեցրել է դեպի Իսրայել և հակառակ ուղղությամբ իրականացվող չվերթները։ Ընկերությունը հայտնել է, որ դադարեցումը կշարունակվի այնքան ժամանակ, մինչև իրավասու մարմինները պարզեն միջադեպի հանգամանքները։
Հետևեք մեզ տելեգրամում
