Ռուսաստանի սպառողների իրավունքների պաշտպանության և մարդու բարեկեցության ոլորտում վերահսկողության ծառայությունը «Ռոսպոտրեբնադզոր» դադարեցրել է հայկական երեք ընկերությունների արտադրած ալկոհոլային խմիչքների վաճառքը։
Արգելքի տակ են հայտնվել «Վեդի Ալկո», «Աբովյանի կոնյակի գործարան» և «Շահնազարյան գինու-կոնյակի տուն» ընկերությունների արտադրանքները։ Մասնավորապես, սահմանափակվել է «Գետափ Վերնաշեն» տեսակի կարմիր կիսաքաղցր գինու, «Վեդի Ալկո»-ի չոր սպիտակ գինու և «Շահնազարյան գինու-կոնյակի տուն» ընկերության 5 աստղանի կոնյակի վաճառքը։ Գերատեսչության տվյալներով՝ նշված արտադրանքները չեն համապատասխանում պարտադիր պահանջներին։
Նշենք, որ ավելի վաղ «Ռոսպոտրեբնադզոր»-ը արգելել էր նաև հայկական «Ջերմուկ» հանքային ջրի ներմուծումն ու վաճառքը Ռուսաստանում, իսկ «Ռոսսելխոզնադզոր»-ը սահմանափակումներ էր կիրառել Հայաստանից ծաղիկների ներմուծման նկատմամբ։
Ռուսական կողմը նշել է, որ Հայաստանից մատակարարումների հետ կապված խնդիրներ կան ոչ միայն ծաղիկների, այլև բանջարեղենի և մրգերի մասով։ «Ռոսսելխոզնադզորի» ղեկավար Սերգեյ Դանկվերտի խոսքով՝ հայկական ձեռնարկություններում ստուգումները կշարունակվեն ևս մեկ շաբաթ։
Հետևեք մեզ տելեգրամում
