Թուրքիայի Ազգային մեծ ժողովի (ԹԱՄԺ) նախագահ Նուման Քուրթուլմուշը հարցազրույց է տվել Ադրբեջանի «Թելեգրաֆ» լրատվական գործակալությանը, որտեղ անդրադարձել է Հարավային Կովկասում ձևավորված նոր իրողություններին, Ադրբեջանի և Հայաստանի միջև խաղաղության գործընթացին, ինչպես նաև Թուրքիա-Հայաստան հարաբերությունների կարգավորմանը։
Քուրթուլմուշը նշել է, որ Ղարաբաղյան պատերազմից հետո տարածաշրջանում ձևավորվել է նոր փուլ, որի հիմնական նպատակը, ըստ նրա, պետք է լինի «ապագայի խաղաղության և համատեղ բարեկեցության կառուցումը»։ Նա ընդգծել է, որ Թուրքիայի և Ադրբեջանի համագործակցությունը դարձել է այդ նոր շրջանի հիմնարար բաղադրիչներից մեկը, իսկ Շուշիի հռչակագրով երկու երկրների հարաբերությունները ռազմական, քաղաքական և տնտեսական ոլորտներում վերածվել են «խոր ինտեգրման»։
ԹԱՄԺ նախագահը հայտարարել է, որ Անկարան ցանկանում է Հարավային Կովկասը դուրս բերել «հակամարտության գոտու» կարգավիճակից և այն վերածել համագործակցության ու ինտեգրման տարածքի։ Նրա խոսքով՝ տարածաշրջանում կայուն խաղաղության հաստատման համար անհրաժեշտ է Ադրբեջանի և Հայաստանի միջև համապարփակ խաղաղության համաձայնագրի ստորագրում, սահմանների հստակեցում և տրանսպորտային ուղիների բացում։
«Մենք գոհունակությամբ ենք արձանագրում Ադրբեջանի և Հայաստանի միջև վերջնական խաղաղության ուղղությամբ արձանագրված առաջընթացը և հույս հայտնում, որ կհաջողվի հասնել կայուն խաղաղության համաձայնագրի։ Թուրքիա-Հայաստան կարգավորման գործընթացը ևս կշարունակի առաջ շարժվել այս զարգացումներին զուգահեռ»,- նշել է նա։
Հետևեք մեզ տելեգրամում
