Այսօր՝ մայիսի 26-ին, Վրաստանը նշում է Անկախության օրը։ Երկրի առաջին ժողովրդավարական հանրապետությունը անկախություն էր հռչակել 1918 թվականի մայիսի 26-ին, սակայն գոյատևել էր շուրջ երկուսուկես տարի՝ մինչև խորհրդայնացումը։ Վրաստանը վերականգնել է իր անկախությունը 1991 թվականին։
Newsgeorgia լրատվակայքի փոխանցմամբ՝ տոնական միջոցառումների շրջանակում իշխանությունները կազմակերպել են լայնամասշտաբ ծրագրեր Թբիլիսիում և երկրի այլ քաղաքներում։ Միաժամանակ, ընդդիմությունը հայտարարել է երեկոյան բողոքի ակցիայի մասին՝ չնայած քաղաքապետարանի արգելքին։ Այս տարի իշխանությունները տոնին տվել են նաև կրոնական շեշտադրում։ Խորհրդարանի շենքում, որտեղ նախկինում տեղադրվում էին Վրաստանի և Եվրամիության դրոշները, այս անգամ տեղադրված է հանգուցյալ պատրիարք Իլիա Երկրորդի պատկերով պաստառ՝ կրոնական բնույթի կարգախոսներով։
Պաշտոնական միջոցառումները մեկնարկել են Թբիլիսիի Ազատության հրապարակում՝ զինվորական շքերթով և զինծառայողների երդման արարողությամբ։ Նշվում է, որ այս տարի երդման արարողությունը կլինի ամենամասշտաբայինը՝ անցկացվելով ոչ միայն Թբիլիսիում, այլև երկրի 12 շրջաններում։
Հետևեք մեզ տելեգրամում
