Իսրայելի վարչապետ Բենիամին Նեթանյահուն բանակին հանձնարարել է ընդլայնել ցամաքային գործողությունները Լիբանանում՝ խորացնելու վերահսկողությունն այն տարածքներում, որոնք գտնվում են «Հեզբոլլահ»-ի տիրապետության տակ։ Այս մասին հայտնում է Reuters-ը։
Ըստ լրատվամիջոցի՝ իսրայելական զորքերը ներկայում վերահսկում են տարածքներ մինչև Լիտանի գետը և առաջ են շարժվում Զահրանի գետի ուղղությամբ։ Վերջին առաջխաղացման ընթացքում Իսրայելի զինված ուժերը վերահսկողության տակ են վերցրել նաև հարավային Լիբանանում գտնվող 900-ամյա Բոֆորի ամրոցը և ռազմավարական նշանակության բարձունքներից մեկը։
Նեթանյահուի այս հայտարարությունը հնչել է ավելի քան վեց շաբաթ առաջ հայտարարված հրադադարի ֆոնին, որի ընթացքում կողմերը շարունակել են փոխադարձ հարվածներ հասցնել։ Լիբանանում իրավիճակի կտրուկ սրման պատճառով Ֆրանսիան կոչ է արել երկուշաբթի օրը հրատապ նիստ գումարել ՄԱԿ-ի Անվտանգության խորհրդում։
Լիբանանի կառավարության տվյալներով՝ մարտի 2-ից ի վեր ռազմական գործողությունների հետևանքով երկրում զոհվել է ավելի քան 3370 մարդ։ Իսրայելը հայտնում է 24 զինծառայողի և 4 քաղաքացիական անձի մահվան մասին։ Հարձակումների հետևանքով տասնյակ հազարավոր մարդիկ լքել են իրենց բնակավայրերը։
Հետևեք մեզ տելեգրամում
