Վրաստանում արձանագրվել է վտանգավոր դենգե վիրուսի դեպք

Վրաստանում հաստատվել է դենգե տենդով վարակման դեպք։ Տեղեկությունը հայտնել է Իաշվիլիի անվան մանկական կենտրոնական հիվանդանոցի տնօրեն Իվանե Չխաիձեն։

Նրա խոսքով՝ վարակման դեպքը գրանցվել է անցած շաբաթ։ Հիվանդի ինքնության և առողջական վիճակի վերաբերյալ մանրամասներ չեն հրապարակվել։

Դենգե տենդը վիրուսային հիվանդություն է, որը փոխանցվում է վարակված մոծակների խայթոցի միջոցով։ Հիվանդության գաղտնի շրջանը սովորաբար տևում է 5-7 օր, իսկ որոշ դեպքերում կարող է հասնել մինչև 15 օրվա։ Դենգեին բնորոշ են բարձր ջերմությունը, ուժեղ դողը, գլխացավը, ինչպես նաև մկանների և հոդերի ցավերը։

Իվանե Չխաիձեն անդրադարձել է նաև Էբոլա տենդի հետ կապված մտահոգություններին՝ ընդգծելով, որ Վրաստանում հիվանդության որևէ դեպք չի արձանագրվել, և ներկայումս դրա տարածման վտանգ չկա։