ՄԱԿ-ին կարող է սպառնալ ֆինանսական ճգնաժամ ԱՄՆ-ի և Չինաստանի վճարումների ուշացման պատճառով

ՄԱԿ-ը կարող է հայտնվել ֆինանսական ճգնաժամի մեջ ԱՄՆ-ի և Չինաստանի կողմից վճարումների ուշացման հետևանքով, որոնք միասին կազմում են կազմակերպության բյուջեի մոտ 42%-ը։ Այս մասին գրում է «The Wall Street Journal»-ը։

Պարբերականի տվյալներով՝ ԱՄՆ-ի պարտքը ՄԱԿ-ին գերազանցում է 4 մլրդ դոլարը, մինչդեռ Չինաստանը, չնայած վերջին վճարումներին, շարունակում է ունենալ մոտ 455 մլն դոլարի պարտավորություններ։ Միաժամանակ նշվում է, որ Վաշինգտոնը իր հետագա ֆինանսավորումը կապում է ՄԱԿ-ի ծախսերի կրճատման և կառավարման բարեփոխումների հետ, որոնք ներառում են աշխատատեղերի կրճատումն ու ծախսերի օպտիմալացումը։

Ֆինանսավորման նվազման ֆոնին ՄԱԿ-ի մի շարք անդամ երկրներ ևս կրճատում են իրենց ներդրումները մարդասիրական ծրագրերում։ Սա արդեն հանգեցրել է կազմակերպության ներսում ծախսերի կրճատման, մի շարք գրասենյակների փակման և աշխատակազմի կրճատման։