ՌԴ նախագահի մամուլի քարտուղար Դմիտրի Պեսկովը հայտարարել է, որ ներկայիս պայմաններում դժվար է պատկերացնել Ուկրաինայի հետ բանակցությունների իրականացումը՝ վկայակոչելով Կիևի գործողությունները։ «ՌԻԱ Նովոստի»-ի փոխանցմամբ՝ Պեսկովը նշել է, որ Ռուսաստանի նախագահ Վլադիմիր Պուտինի գնահատմամբ՝ «ներկայիս պայմաններում և այն գործողությունների ֆոնին, որոնք մենք տեսնում ենք Կիևի ռեժիմի կողմից՝ ահաբեկչական և հանցավոր բնույթի, այդ թվում՝ երեխաների դեմ ուղղված, շատ դժվար է պատկերացնել, թե ինչպես կարելի է այժմ պայմանավորվել Կիևի ռեժիմի հետ»։
Կրեմլի խոսնակը, անդրադառնալով Ղրիմում «Մոսկվա-Սիմֆերոպոլ» ուղևորատար գնացքի վրա իրականացված հարձակմանը, պնդել է, որ Կիևը «ամեն ինչ անում է խաղաղ գործընթացը խոչընդոտելու համար»։
Հիշեցնենք, որ նախորդ շաբաթ Ուկրաինայի նախագահ Վլոդիմիր Զելենսկին հրապարակել էր ուղերձ՝ ուղղված Ռուսաստանի նախագահ Վլոդիմիր Պուտինին։ Նամակում նա քննադատել էր ռուս առաջնորդին, սակայն միաժամանակ առաջարկել էր սկսել ուղիղ երկկողմ երկխոսություն և հանդիպում անցկացնել չեզոք տարածքում՝ օրինակ՝ Շվեյցարիայում, Թուրքիայում կամ Մերձավոր Արևելքի երկրներից մեկում։
Մինչդեռ Վլադիմիր Պուտինը, ելույթ ունենալով Սանկտ Պետերբուրգի միջազգային տնտեսական համաժողով լիագումար նիստում, հայտարարել էր, որ բարձր մակարդակի շփումները հնարավոր են միայն այն բանից հետո, երբ մասնագետների մակարդակով ձեռք բերվեն համապատասխան պայմանավորվածություններ։ Նրա խոսքով՝ ներկայում նման հանդիպումն իմաստ չունի։
Հետևեք մեզ տելեգրամում
