Շվեյցարիայի արտաքին գործերի նախարարությունը հաստատել է, որ հունիսի 19-ին Բյուրգենշտոք քաղաքում պլանավորված ԱՄՆ-Իրան բանակցությունները հետաձգվել են: Այս հանդիպման ընթացքում կողմերը պետք է քննարկեին երկու երկրների միջև հեռավար ձևաչափով ստորագրված հուշագրի տեխնիկական մանրամասները: Այս մասին հայտնում է «Ալ-Ջազիրան»:
Ըստ լրատվամիջոցի՝ Թեհրանը որոշել է հետաձգել իր պատվիրակության գործուղումը Շվեյցարիա՝ ի պատասխան Լիբանանի հարավում Իսրայելի շարունակվող ռազմական գործողությունների: Գործակալության փոխանցմամբ՝ Իսրայելը նոր ինտենսիվ հարվածներ է հասցրել Լիբանանի հարավին, որոնց հետևանքով զոհվել է առնվազն 16 մարդ:
Հիշեցնենք, որ Իրանի ու ԱՄՆ-ի միջև կնքված հուշագրի առաջին կետով պատերազմի դադարեցում է նախատեսվում բոլոր ճակատներում, այդ թվում՝ Լիբանանում: Իսրայելի վարչապետ Բենիամին Նեթանյահուն, սակայն, հայտարարել է, որ իսրայելական բանակը կմնա Լիբանանի հարավում ստեղծված «անվտանգության գոտում» այնքան ժամանակ, որքան դա կպահանջեն երկրի անվտանգության շահերը: Պաշտոնական Թեհրանը շարունակում է պնդել, որ գործարքի հաջողության համար Իսրայելը պետք է ամբողջությամբ դուրս բերի իր զորքերը Լիբանանի հարավային շրջաններից:
Հետևեք մեզ տելեգրամում
