Կիպրոսի Հանրապետությունը ներկայացնող ճանապարհորդների խումբը բարձրացել է Արագած լեռան հյուսիսային գագաթը (4090 մ)։ Արշավախմբի անդամներ Ալեքսանդր Լարինն ու Միխայիլ Օմելչուկն Արագածի գագաթին բարձրացրել են Կիպրոսի Հանրապետության դրոշը, լուսանկարվել են և որպես երկու երկրների միջև բարեկամության խորհրդանիշ՝ այնտեղ թողել են Կիպրոսից բերված քարեր՝ «Կիպրա-հայկական արշավախումբ դեպի Արագած լեռ. հուլիս 2026» մակագրությամբ։ Այս մասին հայտնում է «Արմենպրես»-ը:
Նրանք նշել են, որ այս տարի Արագած լեռը պատված էր անսովոր մեծ քանակությամբ ձյունով։ Ձնակույտերի պատճառով խաչին հասնելն անհնար է դարձել, իսկ գագաթն ամբողջությամբ պատված է եղել խիտ մառախուղով։
Երկու հոգուց բաղկացած առանձին խումբը հաջողությամբ բարձրացել է Արագածի հարավային գագաթ (3879 մ)։ Արշավախմբի ուշագրավ ձեռքբերումներից է 13-ամյա Պերեսվետ Լարինի վերելքը։ Նա դարձել է Կիպրոսի ամենաերիտասարդ բնակիչը, որը հասել է 3879 մետրից ավելի բարձրություն ունեցող գագաթի։
Արշավախումբն իր քայլով դարձել է Կիպրոսի և Հայաստանի միջև առկա ամուր պատմական կապերի խորհրդանիշերից մեկը։ Կիպրոսի Հանրապետության նախագահ Նիկոս Խրիստոդուլիդեսը նախկինում բազմիցս ընդգծել է երկու պետությունների միջև հարաբերությունների առանձնահատուկ բնույթը՝ նշելով, որ հայ համայնքը կիպրական հասարակության անբաժանելի մասն է և նշանակալի ավանդ ունի կղզու մշակութային, սոցիալական և տնտեսական կյանքում։
Արշավախմբի մասնակիցները նշել են, որ վերելքը նվիրված էր Կիպրոսի և Հայաստանի ժողովուրդների միջև բարեկամության ամրապնդմանը, երկու երկրների միջև ակտիվ զբոսաշրջության զարգացմանը, ինչպես նաև երիտասարդների շրջանում լեռնագնացության և առողջ ապրելակերպի խթանմանը։
Մասնակիցների խոսքով՝ նման միջազգային նախագծերը նպաստում են հումանիտար կապերի պահպանմանը և սպորտային ու էկոտուրիզմի զարգացմանը՝ միաժամանակ նոր հնարավորություններ բացելով Կիպրոսի և Հայաստանի միջև սպորտի, զբոսաշրջության, մշակույթի և երիտասարդական փոխանակումների ոլորտներում համագործակցության համար։
Հետևեք մեզ տելեգրամում
