Իսրայելը Միացյալ Նահանգներին հետախուզական տվյալներ է փոխանցել այն մասին, որ Իրանը վերջերս մշակել է ԱՄՆ նախագահ Դոնալդ Թրամփի դեմ նոր մահափորձի ծրագիր։ Այս մասին, հղում անելով իրազեկ աղբյուրներին, հայտնել է «CNN»-ը։
Աղբյուրներից մեկի փոխանցմամբ՝ նախազգուշացումը Վաշինգտոնին փոխանցվել է այս շաբաթ։ Մյուս աղբյուրի խոսքով՝ ամերիկյան հետախուզությունը վերջին շաբաթներին արդեն տեղեկություններ էր ստանում Թրամփի դեմ հնարավոր հարձակումների նախապատրաստման վերաբերյալ, սակայն Իսրայելի փոխանցած տվյալները վերաբերում էին կոնկրետ ենթադրյալ ծրագրի։
Միևնույն ժամանակ, ամերիկացի մի շարք պաշտոնյաներ չեն բացառել, որ Իսրայելի այս քայլը կարող էր նպատակ ունենալ ազդել Թրամփի որոշումների վրա, մինչ նա քննարկում է Իրանի նկատմամբ ռազմական գործողությունների հնարավոր ընդլայնումը։
ԱՄՆ-ն դեռևս չի հաստատել Իսրայելի փոխանցած տեղեկությունների հավաստիությունը։ Սպիտակ տունը, մեկնաբանելով տեղեկությունները, հիշեցրել է Թրամփի վերջին հայտարարությունները, որոնցում նա ասել էր, որ Իրանը ցանկանում է իրեն սպանել։
«Նրանք ցանկանում են վերացնել ԱՄՆ առաջնորդին՝ ինձ։ Ես նրանց բոլոր ցուցակներում եմ։ Մինչ այժմ պարզապես բախտս բերել է, բայց դա կարող է երկար չտևել։ Սրանք չար մարդիկ են, և այդ քաղցկեղը պետք է արմատախիլ անել»,- հայտարարել էր Թրամփը։
«CNN»-ի տվյալներով՝ ԱՄՆ հետախուզությունը շարունակում է հետևել մի քանի անձանց և խմբերի, որոնք քննարկել են հնարավոր հարձակումները, սակայն դեռևս գործնական քայլեր չեն իրականացրել։ Միաժամանակ նշվում է, որ Իրանը կարող է թիրախավորել ԱՄՆ ներկայիս և նախկին բարձրաստիճան պաշտոնյաներին։
Հետևեք մեզ տելեգրամում
